Gujarati News

Gujarati News

News of Thursday, 19th November 2020

‘બિંગો’ ની એડના કારણે રણવીરસિંહ મુશ્કેલીમાં મુકાયોઃ સુશાંતસિંહ રાજપૂતના ફેન્સ ખૂબજ નારાજઃ જાહેરાતની બહિષ્કારની માંગણી

નવી દિલ્હી: સુશાંત સિંહ રાજપૂતના નિધન બાદથી જ તેના ફેન્સ સતત તેના માટે ન્યાયની માગણી કરી રહ્યા છે. અવારનવાર સુશાંત સિંહના ફેન્સ કઈક નવું ટ્વિટર પર ટ્રેન્ડ કરે છે. આવામાં સુશાંતના ફેન્સ એક નવા મુદ્દાને ઉઠાવી રહ્યા છે. એક નવો ટેગ ટ્રેન્ડ થઈ રહ્યો છે. આ વખતે #BoycottBingo ટ્રેન્ડિંગ થયો છે. જેનું કારણ છે રણવીર સિંહની એક નવી એડ. હકીકતમાં રણવીર સિંહની આ એડ જોઈને સુશાંતના ફેન્સ ખુબ જ નારાજ થયા છે અને તેઓ તેને સુશાંત વિરુદ્ધ ગણાવી રહ્યા છે. 

એડમાં રણવીરને બિંગો ખાતા બતાવવામાં આવ્યો છે. એડમાં દેખાડ્યું છે કે રણવીર સિંહના ઘરે કેટલાક મહેમાનો આવ્યા છે. આ મહેમાનો તેને આગળનો પ્લાન પૂછી રહ્યા છે. આ સવાલોથી પરેશાન થઈને રણવીર એવા જવાબો આપે છે કે બધાની બોલતી બંધ થઈ જાય છે. રણવીર પોતાના જવાબમાં માર્સ, ફેન્ટમ, એલિયન જેવા શબ્દોનો ઉપયોગ કરે છે. જેને સાંભળીને સામે વાળા ચક્કર ખાઈ જાય છે. 

આ એડને જોઈને લોકોને લાગે છે કે આવું કરીને તેઓ સુશાંતની મજાક ઉડાવી રહ્યા છે. હવે બધા આ એડના બહિષ્કારની માગણી કરી રહ્યા છે. હકીકતમાં સુશાંતને સ્પેસ અને સાયન્સમાં ખુબ રસ હતો. આ એડને તેની સાથે જોડવામાં આવી રહી છે. આમ તો આ એડમાં ક્યાય સુશાંતનું નામ નથી. ફક્ત એક એવી વાર્તા જણાવવામાં આવી છે કે જ્યાં વ્યક્તિ કઈક નવું કરવા માંગે છે અને લોકો તેને સવાલ કરે છે કે તે જીવનમાં આગળ શું કરશે. 

અત્રે જણાવવાનું કે વિરોધના પગલે બિંગોએ પોતાની યુટ્યૂબ ચેનલ પર પોસ્ટ કરેલા આ વીડિયોના કોમેન્ટ અને લાઈક્સ સેક્શનને બંધ કરી દીધા છે. હવે જોવાનું એ રહેશે કે સોશિયલ મીડિયા પર ચાલી રહેલા આ ટ્રેન્ડનો રણવીર શું જવાબ આપે છે. શું મહેમાનોની જેમ તે નેટિઝન્સની પણ બોલતી બંધ કરી શકશે?

(4:59 pm IST)