Gujarati News

મુંબઇ,તા. ૨૭: સામાન્ય માણસ હોય કે પછી સેલેબ્ઝ હવે તો કોઈપણ કોરોના વાયરસના સંક્રમણથી બચ્યું નથી. બોલીવુડ ઈન્ડસ્ટ્રી સાથે જોડાયેલ વધુ એક વ્યકિત કોરોનાની ચપેટમાં આવેલ છે. અભિનેત્રી તમન્ના ભાટિયાના પેરેન્ટ્સનો કોરોના રિપોર્ટ પોઝિટિવ આવ્યો છે. જોકે, તમન્ના ભાટિયા અને તેના અન્ય સ્ટાફ મેમ્બરોનો કોરોના રિપોર્ટ નેગેટિવ આવ્યો છે. અભિનેત્રીએ સોશ્યલ મીડિયા પોસ્ટ દ્વારા આ માહિતી આપી છે.

તમન્ના ભાટિયાએ સોશ્યલ મીડિયા પોસ્ટમાં લખ્યું હતું કે, મારા પેરેન્ટ્સને વિકએન્ડમાં કોરોના વાયરસના હળવા લક્ષણો જોવા મળ્યા હતા. સજાગતાના ભાગરૂપે ઘરના તમામ લોકોનો તાત્કાલિક ટેસ્ટ કરાવ્યો હતો. રિપોર્ટનું પરિણામ હમણાં જ આવ્યું છે. ફકત મારા પેરેન્ટ્સનો રિપોર્ટ પોઝિટિવ આવ્યો છે. અમે અધિકૃત અધિકારીઓને આ બાબતની જાણ કરી દીધી છે. બાકીના તમામ ફેમેલી મેમ્બર, સ્ટાફ અને મારો રિપોર્ટ નેગેટિવ આવ્યો છે. ભગવાનની કૃપાથી તેઓ આ મહામારીને લડત આપી રહ્યાં છે. આપ તમામની પ્રાર્થના અને આશીર્વાદ તેમને સાજા થવામાં મદદ કરશે.

તમને જણાવી દઈએ કે, લોકડાઉન દરમિયાન તમન્ના ભાટિયા સોશ્યલ મીડિયા પર બહુ જ એકિટવ હતી. તે હંમેશા પોતાનું ડેઈલી રૂટિન શેર કરતી હતી. લોકડાઉન દરમિયાન તેણે ફિટનેસ પર ધ્યાન આપ્યું હતું. એટલું જ નહીં યોગ અને એકસરાઈઝના વીડિયો પણ સોશ્યલ મીડિયા પર શેર કર્યા હતાં.