Gujarati News

મુંબઇ, તા. ૨૭ : બોલિવૂડ અભિનેત્રી કંગના રનૌત સોશિયલ મીડિયામાં ઘણી એક્ટિવ રહે છે. સોશિયલ મીડિયામાં હંમેશા બોલિવૂડ પર નિશાન સાધનારી કંગનાએ આજે તેના ટ્વિટ એકાઉન્ટ પર એક તસવીર શેર કરી હતી. જે બાદ તે ટ્રોલર્સના નિશાન પર આવી ગઇ છે. કંગના રનૌતે બોલિવૂડ અભિનેતા સંજય દત્ત સાથેની તસવીર શેર કરી હતી. જે બાદ લોકો આ અંગે કમેન્ટ્સ કરી રહ્યાં છે. ઘણા સોશિયલ મીડિયા યુઝર્સને આ વાત ગમી તો ઘણા લોકો તેની ટિકા કરી રહ્યાં છે અને કટાક્ષ કરી રહ્યાં છે.

કંગના રનૌતે તસવીર શેર કરતાં લખ્યું, જ્યારે મને જાણવા મળ્યું કે અમે હૈદરાબાદમાં એક જ હોટલમાં રોકાયેલા છીએ, તો હું સવારે સંજૂ સરને મળીને તેમના સ્વાસ્થ્ય વિશે પૂછવા માટે પહોંચી ગઇ. તેમને પહેલાં કરતાં વધુ હેન્ડસમ અને સ્વસ્થ જોઇને ખુશી થઇ. અમે તમારા લાંબા આયુષ્ય અને સારા સ્વાસ્થ્યની કામના કરીએ છીએ. કંગનાની આ પોસ્ટ જોઇને ટ્રોલર્સ તેની પર નિશાન સાધી રહ્યાં છે. ઘણા લોકોએ ર્ડ્ગ્સને લઇને કટાક્ષ કર્યો તો કેટલાકે લખ્યું કે, તે નેપોટિઝમનું પ્રોડક્ટ છે.

ઉલ્લેખનીય છે કે, આજકાલ કંગના રનૌત હૈદરાબાદમાં તેની આગામી ફિલ્મ થલાઇવીનું શૂટિંગ કરી રહી છે. ફિલ્મમાં તે જયલલિતાના પાત્રમાં જોવા મળશે. સાથે જ તેણે આગામી ફિલ્મ ધાકડ માટે હૈદરાબાદમાં ટ્રેનિંગ શૂર કરી દીધી છે.

સંજય દત્તના વર્કફ્રન્ટની વાત કરીએ તો તે ફિલ્મ કેજીએફ-૨માં જોવા મળશે. ઉપરાંત સંજય દત્ત શમશેરામાં રણબિર કપૂર, વાણી કપૂર સાથે અને ફિલ્મ પૃથ્વીરાજમાં અક્ષય કુમાર અને માનુષી છિલ્લર સાથે જોવા મળશે.