Gujarati News

અમદાવાદ,તા.૧૯ : શહેરની પોશ કર્ણાવતી ક્લબની ઓફિસ ગુરુવાર સુધી બંધ રહેશે. તાજેતરમાં ક્લબના સીઈઓ અને પ્રેસિડેન્ટ સહિત ૮ લોકોનો કોરોનાનો રિપોર્ટ પોઝિટિવ આવ્યો હોવાનું સૂત્રોએ જણાવ્યું હતું. વ્યંગની વાત તો એ છે કે, ક્લબના કેટલાંક સભ્યોને આ અંગે ખબર નથી અને તેઓ ક્લબની નિયમિત મુલાકાત લઈ રહ્યા છે. પરિસ્થિતિ એટલી ગંભીર હોવા છતાં ક્લબ તેના આશરે ૧૫૦૦૦ જેટલા મેમ્બર્સને રવિવાર સુધી ઓફિશિયલી જાણ કરવા તેમજ સાવચેતી રાખવામાં નિષ્ફળ રહી છે. મંગળવારે નવા કેસોની શરૂઆત થયા બાદ શુક્રવારે બપોરે ઓફિસ બંધ કરવામાં આવી હતી. ગુરુવાર સુધી ક્લબના સભ્યોને સ્ટાફના કોરોના ટેસ્ટ અને ઓફિસ બંધ કરવા અંગે કેમ જાણ કરવામાં નહોતી આવી? તેવો સવાલ કરતા કર્ણાવતી ક્લબ સેક્રેટરી કેતન પટેલે જણાવ્યું હતું કે, સભ્યો ઓફિસ એરિયા સાથે કનેક્ટેડ નથી કારણે કે બધુ ઓનલાઈન થાય છે. તેઓ સીધા જિમ અને જોગિંગ ટ્રેક પર જાય છે તેથી તેઓ ઓફિસ સાથે બિલકુલ કનેક્ટેડ નથી. અમે તેઓ બિનજરૂરી ગભરાય તેવું નહોતા ઈચ્છતા હતા.

              જો કે, અમે તેમને સોમવાર સુધીમાં ઓફિસ બંધ થવા અંગે મેસેજ મોકલીશું. પરિસ્થિતિ અંગે જાગૃત સભ્યો માને છે કે મેનેજમેન્ટે તમામ સભ્યોને જાણ કરવી જોઇએ. જેથી જે લોકો સંક્રમિત વ્યક્તિઓ સાથે સંપર્કમાં આવ્યા હોય તેમજ ક્લબની મુલાકાત લેતા હોય તે લોકો જરૂરી સાવચેતી રાખી શકે. સૂત્રોના જણાવ્યા અનુસાર, કોરોનાનો રિપોર્ટ પોઝિટિવ આવ્યા બાદ ક્લબના કેટલાક સ્ટાફ સભ્યોને હોસ્પિટલમાં દાખલ કરવામાં આવ્યા હતા અથવા હોમ ક્વોરેન્ટાઇન કરવામાં આવ્યા હતા. ત્યારબાદથી ક્લબ ઓફિસ બંધ કરી દેવામાં આવી છે અને સમગ્ર સ્ટાફને પરીક્ષણ કરવા જણાવાયું છે. સૂત્રોના જણાવ્યા અનુસાર ક્લબમાં દરરોજ ૩૦૦ સભ્યો મુલાકાત લે છે અને કેમ્પસમાં અન્ય ૪૫૦ કર્મચારીઓ કામ કરે છે. પોઝિટિવ પરીક્ષણ કરનારાઓમાં ક્લબના સીઈઓ આરકે ભટ્ટ (૮૧) પણ છે. આરકે ભટ્ટ તેમની ફરજના ભાગ રૂપે નિયમિતપણે ક્લબની મુલાકાત લેતા હતા. તેમની સાથે આઠથી દસ કર્મચારીઓએ પણ કોરોના માટે સકારાત્મક પરીક્ષણ કર્યું હોવાનું સૂત્રએ જણાવ્યું હતું. સમાચારની પુષ્ટિ કરતાં આરકે ભટ્ટે કહ્યું, હા, મારી પત્ની અને મેં કોવિડ -૧૯ માટે સકારાત્મક પરીક્ષણ કર્યું છે. અમે શેલ્બી હોસ્પિટલમાં સારવાર લઈ રહ્યા છીએ. ગત મંગળવારે થોડા લક્ષણો જણાતા કોરોનાનો ટેસ્ટ કરાવ્યો હતો. મને એક દિવસ માટે આઈસીયુમાં દાખલ કરાયો હતો. પરંતુ હવે મને રૂમમાં શિફ્ટ કરવામાં આવ્યો છે. ઓફિસ કેમ બંધ હતી તેવો સવાલ પૂછતા તેમણે જણાવ્યું કે, કોરોના સંક્રમણને કારણે છેલ્લા એક અઠવાડિયાથી ઘણા લોકો ક્વોરેન્ટાઈન હતા. તેથી ક્લબ દ્વારા સ્ટાફની સાવચેતીને ધ્યાનમાં રાખીને ઓફિસ બંધ રાખવાનો નિર્ણય લેવામાં આવ્યો હતો. ક્લબના સેક્રેટરી કેતન પટેલે જણાવ્યું હતું કે, સલામતીના ભાગરૂપે અમે ક્લબ ઓફિસ બંધ કરી દીધી છે અને કર્મચારીઓને બુધવાર સુધી ઘરેથી કામ કરવા જણાવ્યું છે. તેઓ પોતાનો કોરોનાનો ટેસ્ટ કરાવશે. અમે પણ તેમના આરટી-પીસીઆર પરીક્ષણો કરાવીશું.

              એટલું જ નહીં તેમણે ક્લબના પ્રેસિડેન્ટ એન.જી. પટેલ (૬૯) અને વાઈસ પ્રેસિડેન્ટ જયેશ મોદી (૫૯)ને કોરોના થયો હોવાની પણ પુષ્ટિ કરી હતી. ક્લબના આસિસ્ટન્ટ એકાઉન્ટ મેનેજર અલ્પેશ શાહે જણાવ્યું હતું કે, ભટ્ટ છેલ્લા કેટલાક દિવસોથી ક્લબમાં ન દેખાતા હોવાથી તેઓએ અમારા કરતા પહેલા ટેસ્ટ કરાવ્યો હોય તેવું બની શકે. બાદમાં, મેં કોવિડ માટે સકારાત્મક પરીક્ષણ કર્યું અને હું હોમ ક્વોરેન્ટાઈન છું. તેમણે ઉમેર્યું કે, ક્લબ કોવિડ હાઇજીન જાળવવા જેવી તમામ સાવચેતી રાખે છે જેમ કે સેનિટાઇઝર્સ અને ટેમ્પરેચર ગનનો ઉપયોગ કરે છે. પરંતુ, આપણે સમજવું જરૂરી છે કે ટેમ્પરેચર ગન એસિમ્પટોમેટિક કેસ શોધી શકતી નથી. ક્લબ આપણી સારી સંભાળ રાખે છે, તેમાં તેની ભૂલ નથી. ક્લબમાં કોવિડ કેસોથી વાકેફ સભ્યોને આશ્ચર્ય થાય છે કે માત્ર ઓફિસ કેમ બંધ કરવામાં આવી છે. સભ્યોએ પૂછ્યું કે, જો કેસોમાં ઉછાળો જોવા મળ્યો હોય તો ક્લબમાં કાર્ડ રૂમ અને અન્ય સુવિધાઓ અઠવાડિયા માટે કેમ બંધ નથી? તેના જવાબમાં કેતન પટેલે કહ્યું, ક્લબનું કાર્ડ રૂમ બંધ છે તે સારું છે કારણ કે ત્યાં કોઈ જતું નથી. જ્યાં સુધી અન્ય સેવાઓનો સવાલ છે, ત્યાં ઘણા ઓછા મુલાકાતીઓ તેનો લાભ લે છે. સોશિયલ ડિસ્ટન્સિંગ જળવાય તે માટે ઓછી સંખ્યામાં લોકો જોગિંગ અને વોકિંગ ટ્રેક પર જોવા મળે છે.