Gujarati News

Gujarati News

News of Tuesday, 24th November 2020

વીએસ હોસ્પિ.ના ડૉ. મેહુલને ધમકી ભર્યા ઈમેલ આવ્યા

સાયબર ક્રાઈમમાં ફરિયાદ દાખલ થઇ : પોલીસે તપાસ કરતા પાટણની ડોક્ટર યુવતી દ્વારા આ બનાવટી ઈમેઈલ આઈડી બનાવ્યું હોવાનું જાણવા મળ્યું

અમદાવાદ,તા.૨૪ : સાયબર ક્રાઈમ પોલીસે શનિવારે વિધિ શાહ નામની ૨૬ વર્ષીય ડોક્ટર યુવતીની અટકાયત કરી હતી કારણકે આ યુવતીએ ડોક્ટર મેહુલ મહેતા અને તેની ગર્લફ્રેન્ડને બનાવટી ઈમેઈલ આઈડી પરથી ધમકીભર્યા મેઈલ કર્યા હતા. પોલીસે આ વિશે વાત કરતા જણાવ્યું કે વિધિ શાહ નામની આ ડોક્ટર યુવતીની અગાઉ ડોક્ટર મેહુલ મહેતાની સાથે સગાઈ થઈ હતી. પરંતુ, મનમેળ નહીં બેસતા આ સગાઈ તૂટી ગઈ હતી. આ કારણે પાટણની ડોક્ટર વિધિ શાહે, ડોક્ટર મેહુલ મહેતાને હેરાન કરવા માટે આ પ્રકારે ધમકીભર્યા ઈમેઈલ કર્યા હોવાનું જાણવા મળ્યું છે.

          વીએસ હોસ્પિટલમાં ફરજ બજાવતા ડોક્ટર મેહુલ મહેતાને ઈમેઈલ પર ધમકી મળતા તેમણે સાયબર ક્રાઈમમાં આ અંગે ફરિયાદ દાખલ કરી હતી. પોલીસે તપાસ કરતા પાટણની ડોક્ટર યુવતી દ્વારા આ બનાવટી ઈમેઈલ આઈડી બનાવ્યું હોવાનુ જાણવા મળ્યું હતું. આ કેસની તપાસકર્તાએ જણાવ્યું કે ડોક્ટર યુવકે તેની ફરિયાદમાં જણાવ્યું હતું કે આરોપીએ તેની ગર્લફ્રેન્ડને એવું લખ્યું હતું કે તેણે મારી બહેનને મારી નાખી અને એક સ્ત્રી તરીકે તારામાં કોઈ સંવેદના કેમ નથી? આરોપીએ એવી ધમકી પણ આપી હતી કે હવે જો શું થાય છે.

(7:58 pm IST)