Gujarati News

Gujarati News

News of Saturday, 27th February 2021

નજીવી બાબતે બે યુવાનોનો એકબીજા પર એસિડ એટેક

અમદાવાદના માધુપુરા વિસ્તારની ઘટના : યુવક એટલો આવેશમાં આવી ગયો કે, તરત તેના ઘરે ગયો અને એક બોટલમાં એસિડ ભરીને લઈને આવ્યો હતો

અમદાવાદ,તા.૨૭ : શહેરમાં નાની નાની બાબતો મોટી ઘટનાને અંજામ આપી દેતી હોય તેવી અનેક ઘટનાઓ સામે આવી રહી છે. આવી જ એક ઘટના શહેરના માધુપુરા વિસ્તારમાં બની છે. જ્યાં સામે જોવા બાબતે અને ગાળો બોલવા બાબતે બે યુવકો આમને સામને આવી ગયા હતા. આ બંને શખસોએ એકબીજા સાથે મારામારી કરી હતી. બાદમાં બંને એકબીજાના ઘરેથી એક બોટલમાં એસિડ લઈ આવ્યા હતા. બંનેએ એકબીજા પર એસિડ ફેકતા બંનેને ઈજાઓ પહોંચી અને બળતરા પણ થવા લાગ્યા હતા. એક યુવકના પુત્રને પણ બળતરા થવા લાગી હતી. ત્રણેય લોકોને સારવાર અર્થે ખસેડી પોલીસે બંનેની ક્રોસ ફરિયાદ નોંધી તપાસ હાથ ધરી છે. માધુપુરામાં રહેતો ૨૯ વર્ષીય અક્ષય ચુનારા કાપડની દુકાનમાં નોકરી કરે છે. ૨૩મીએ તે તેના ઘરની બહાર ઉભો હતો. ત્યારે સામે રહેતો રાકેશ દંતાણી ગાળો બોલતો હતો. તેને ગાળો બોલવાની ના પાડતા તેને બોલાચાલી કરી અને બાદમાં મારામારી કરી હતી. રાકેશ એટલો આવેશમાં આવી ગયો કે, તરત તેના ઘરે ગયો અને એક બોટલમાં એસિડ ભરીને લઈને આવ્યો હતો. બોટલમાં ભરેલું એસિડ ફેકતા જ અક્ષય પર છાંટા ઉડયા હતા. જેથી અક્ષય મોઢા અને ગળાના ભાગે દાઝી ગયો હતો. તાત્કાલિક લોકો ભેગા થઈ ગયા અને અક્ષયને સારવાર અર્થે હોસ્પિટલ ખસેડયો હતો. બાદમાં માધુપુરા પોલીસને જાણ કરાતા પોલીસે રાકેશ સામે ગુનો નોંધી તપાસ હાથ ધરી છે. ત્યારે બીજી ફરિયાદ મુજબ અહીં રહેતા રાકેશે અક્ષય સામે ફરિયાદ નોંધાવી છે. તેણે આક્ષેપ કર્યો છે કે, તેના ઘર પાસે ઉભો હતો. ત્યારે અક્ષયે તું મારી સામે કેમ જોવે છે કહીને બબાલ કરી હતી. બાદમાં અક્ષયે મારામારી કરી હતી અને બાદમાં તે તેના ઘરે ગયો હતો. જ્યાંથી તે એક બોટલમાં જ્વલનશીલ પ્રવાહી લઈને આવ્યો હતો અને તે બોટલ પડતા જ રાકેશને અને તેના પાંચ વર્ષના બાળકને બળતરા અને ઈજાઓ પહોંચી હતી. બંનેને સારવાર અર્થે ખસેડાતા માધુપુરા પોલીસને આ અંગે જાણ કરાઈ હતી. આ મામલે માધુપુરા પોલીસે પણ અક્ષય સામે ગુનો નોંધી તપાસ હાથ ધરી છે.

(9:26 pm IST)
  • બે દાયકા પહેલા રાજનાથસિંહે બાળક લીધો હતો દત્તક : તેના લગ્નમાં પહોંચી આશીર્વાદ આપ્યા :રક્ષામંત્રી રાજનાથસિંહે કહ્યું હું જયારે ઉત્તરપ્રદેશનો મુખ્યમંત્રી હતો ત્યારે વિજેન્દરના અભ્યાસનો ખર્ચ ઉઠાવવા નક્કી કર્યું હતું : આજે ડોક્ટર તરીકે જોઈને ખુબ ખુશી થઇ છે access_time 12:40 am IST

  • કોરોનાનો કહેર વધતા આંતરરાષ્ટ્રીય યાત્રી ઉડાનો પર 31મી માર્ચ સુધી પ્રતિબંધ લંબાવાયો : DGCAએ ભારત આવનારી અને અહીંથી જનાર વાણિજ્યીક આંતરરાષ્ટ્રીય ઉદયન પર પ્રતિબંધ 31 માર્ચ સુધી વધારી દીધો access_time 12:48 am IST

  • કોરોનાના વધતા કેસથી યુપી અને ઓરિસ્સા સરકાર એલર્ટ : અન્ય રાજ્યોમાંથી આવનાર માટે ક્વોરેન્ટાઇન અનિવાર્ય : ઓરિસામાં હવે મહારાષ્ટ્ર, કેરળ, તમિલનાડુ,છત્તીસગઢ,મધ્યપ્રદેશ, તેલંગાણા, પશ્ચિમ બંગાળ , પંજાબ, દિલ્હી, ચંદીગઢ, કર્ણાટક,અને આંધ્રપ્રદેશથી આવનારા લોકોને 7 દિવસ હોમ આઇસોલેશન ફરજીયાત કરાયું access_time 12:44 am IST