Gujarati News

Gujarati News

News of Saturday, 10th October 2020

ઇઝરાયલની આઠ વર્ષની બાળકીએ પાળ્યો છે ૧૧ ફુટ લાંબો અજગર

તેલચાવીવી,તા. ૧૦: ઇઝરાયલના દક્ષિણ ભાગના ખેડૂત પરિવારની આઠ વર્ષની બાળકી ઇનબારે ૧૧ ફૂટ લાંબો અજગર પાળ્યો છે. એ અજગર સાથે તેને એવી દોસ્તી બંધાઈ છે કે ઇનબાર રોજ સ્વિમિંગ-પૂલમાં જાય ત્યારે બેલે નામનો એ અજગર પણ તેની સાથે જ હોય. ઇનબારનો પરિવાર દક્ષિણ ઇઝરાયલના પશુ અભયારણ્યના ક્ષેત્રમાં કહે છે. વોલ્ટ ડિઝનીની એનિમેટેડ ફિલ્મ 'બ્યુટી એન્ડ ધ બીસ્ટ'માં પીળા રંગનો ગાઉન પહેરેલી બેલે નામની કન્યાના પાત્રને ધ્યાનમાં રાખીને અજગરનું નામ બેલે પાડવામાં આવ્યું છે. કોરોના- વેકેશનમાં અજગર બેલે ઇનબારનો ગાઢ મિત્ર બની ગયો છે. તે સાવ ટબૂકડી હતી ત્યારથી જ તેના પરિવારમાં નાના સાપ અને અજગર પાળવામાં આવ્યા હતા. ઇનબારની સાથે-સાથે આ અજગર પણ લાંબો અને મોટો થઈ ગયો છે.

જોકે બાળપણથી બન્ને સાથે રમતાં- નાહતાં અને સૂતાં હોવાથી ઇનબારને અજગરનો ડર નથી રહ્યો, ઊલટાનું બન્ને વચ્ચે ખૂબ ગહેરી દોસ્તી જામી છે. ઇનબારના અજગર સાથેના વિડિયો સોશ્યલ મીડિયામાં વાઇરલ થયા છે અને કેટલાક લોકો આટલી નાની બાળકીને અજગર જેવા હિંસક પ્રાણી સાથે આમ જ રમવા દેવા બદલ પેરન્ટ્સને બેજવાબદાર ગણાવી રહ્યા છે.

(11:28 am IST)