Gujarati News

ભોપાલ, તા. ૧૯ : ભારતીય જનતા પાર્ટીનાં નેતા ઇમરતી દેવી અંગે પૂર્વ સીએમ અને કોંગ્રેસ નેતા કમલનાથની ટિપ્પણીને લઈને હોબાળો મચ્યો છે. ભાજપ તેમની ટિપ્પણીનો સખ્ત વિરોધ કરી રહ્યો છે. મૌન ઉપવાસ બાદ મુખ્યમંત્રી શિવરાજસિંહ ચૌહાણે કોંગ્રેસ અધ્યક્ષ સોનિયા ગાંધીને પત્ર લખીને કમલનાથને પાર્ટીના તમામ પદ પરથી હટાવવાની માગ કરી છે. તેમણે પત્રમાં લખ્યું, 'આપની પાર્ટીના નેતા અને પૂર્વ મુખ્યમંત્રીએ આ (અભદ્ર) ટિપ્પણી કરી છે. શું એ યોગ્ય છે, શું ગરીબ મહિલાનું કોઈ સન્માન નથી હોતું? જો તમને લાગે કે ટિપ્પણી ખોટી હતી, તો તમે શું પગલાં ભરશો? હું તમને નિર્ણય લેવા વિનંતી કરું છું. તેમણે કહ્યું, મને ખુલાસાની અપેક્ષા હતી, પરંતુ નિવેદન નિર્લજ્જતા સાથે ન્યાયી ઠેરવવામાં આવી રહ્યું છે.

           આપ મને ગાળ ભાંડી શકો છો, મને કોઈ નામ આપી શકો છો, પરંતુ એક મહિલા વિશેની આ પ્રકારની ટિપ્પણી દરેક દીકરી અને માતાની વિરુદ્ધ છે. નવરાત્રીમાં મહિલાઓનું અપમાન કરવામાં આવ્યું છે. તેમણે (કમલનાથે) નિર્લજ્જતાની તમામ હદ વટાવી દીધી છે. તેમણે પાર્ટી અધ્યક્ષને આગ્રહ કર્યો છે કે કમલનાથને તાત્કાલિક પાર્ટીના પદો પરથી હટાવવા અને તેમના નિવેદનની કડક નિંદા કરવી. તેમણે સોનિયા ગાંધીને એમ પણ કહ્યું કે જો તમે આ અભદ્ર ટિપ્પણી પર પ્રતિક્રિયા આપવામાં નિષ્ફળ થશો તો હું માની લેવા મજબૂર થઈશ કે તમે તેમના સમર્થનમાં છો. પોતાના નિવેદન અંગે સ્પષ્ટતા કરતા કમલનાથે કહ્યું છે કે કોઈનું અપમાન કરવાના હેતુથી મેં એવું કહ્યું નથી. તેમણે કહ્યું કે હું તેમનું નામ ભૂલી ગયો હતો. ત્યારબાદ એક માણસના હાથમાં રહેલા કાગળ તરફ ઇશારો કરતાં તેણે કહ્યું કે આ અમારી યાદી છે, જેમાં આઇટમ નં.૧, આઇટમ નં ..૨ લખાયેલું છે. શું આ કોઈનું અપમાન છે? શિવરાજ તકની શોધમાં છે, કમલનાથ કોઈનું અપમાન કરતા નથી. નોંધપાત્ર વાત એ છે કે એક જાહેર સભા દરમિયાન કમલનાથે ઇમરતી દેવી વિશે અભદ્ર ટિપ્પણી કરી હતી. તેમણે કહ્યું હતું કે આ સુરેશ રાજે અમારા ઉમેદવાર છે. સરળ, સીધા, તેઓ તો કરશે. આ તેમના જેવા નથી, શું નામ છે તેમનું (ભીડમાંથી અવાજ આવે છે ઈમરતી), શું તેમનું નામ લઉં, માર કરતા તો આપ લોકો વધુ ઓળખો છો, પહેલાથી જ સાવચેત કરી દેવા હતા કે શું (અશોભનિય શબ્દ) છે.