Gujarati News

કોલકાતા,તા.૧૭ : ૨૩ વર્ષ પહેલા જાતીય સતામણીનો ભોગ બનેલી એક યુવતીએ પોલીસ ફરિયાદ કરતા દાજીર્લિંગમાં એક સ્કૂલ ટિચરની ધરપકડ કરવામાં આવી. પીડિતા તે સમયે ૧૪ વર્ષની હતી. હાલમાં આ ૩૭ વર્ષીય પીડિતા મહિલા હોંગકોંગમાં છે અને વકીલ તરીકે વ્યવસાય કરે છે. તેનું કહેવું છે કે બે દાયકામાં ૨૦થી વધુ શાળાઓમાં શિક્ષક તરીકે ફરજ બજાવતા જીતેશ ઓઝાએ તેમના અનેક જુનિયર્સ વિદ્યાર્થીઓએ પણ જાતિય સતામણી કરી હોવાની ફરિયાદો કરી છે.

વર્ષો સુધી શોષણનો ભોગ બન્યા બાદ ઘણા શકિતશાળી માણસો સામે જાતીય શોષણનો આરોપ મૂકવામાં આવ્યો હતો.આ ઘટના #MeToo કેમ્પેઈન બાદ સામે આવી.

મહિલાએ ગત વર્ષે સપ્ટેમ્બરમાં ઈમેઈલ મારફતે દાર્જિલિંગ સદર પોલીસ સ્ટેશનમાં ફરિયાદ નોંધાવી હતી. તે મુજબ બે દાયકા કરતા પણ વધારે સમય પહેલા પીડિતાના દાર્જિલિંગ સ્થિત ઘરે ખાનગી ટ્યુશન આપવા માટે આવતા શિક્ષક જીતેશ ઓઝાએ એક મહિના કરતા વધુ સમય તેનું જાતિય શોષણ કર્યું હતું. પોલીસે જણાવ્યું કે કોરોના વચ્ચે તેઓ છેલ્લા એક વર્ષથી આ કેસની તપાસ કરી રહ્યા છે. તેને લગતા પુરાવા, સાક્ષી અને પીડિતોની શોધ કરવામાં આવી. ૪૬ વર્ષિય ઓઝાએ પત્ની અને બાળક સાથે હાલમાં જ સિલિગુડીમાં ઘર ભાડે રાખ્યું હતું. શિક્ષકની ૫ ઓકટોબરના રોજ ધરપકડ કરવામાં આવી છે.

આ અંગે દાર્જિલિંગના ડેપ્યુટી SP રાહુલ પાંડેએ જણાવ્યું છે કે, 'મહિલાની ફરિયાદ પર વિશ્વાસ ન કરવાનો કોઈ પ્રશ્નન હતો. અમને સપ્ટેમ્બર ૨૦૧૯માં તેમના તરફથી પહેલી ફરિયાદ મળી હતી. શિક્ષણ જગતમાં સારી પ્રતિષ્ઠા ધરાવતા શિક્ષકની તપાસ શરૂ કરવામાં આવી. જાતિય શોષણ અંગે પીડિતાએ વધુ માહિતી મેઈલ મારફતે મોકલી આપી હતી. ત્યાર બાદ અમે આવી વધુ પીડિતાઓની પુછપરછ કરતા શિક્ષકની ધરપકડ કરવા માટે પુરતા પુરાવા મળી આવ્યા.'

ઓઝાને બે દિવસ પોલીસ કસ્ટડીમાં રાખ્યા બાદ કોર્ટ મારફતે ૨૩ ઓકટોબર સુધી રીમાન્ડ માટે મોકલી આપવામાં આવ્યા છે. આ બાબતે વકીલ અનિર્બાન ગુહા થાકૂર્તાએ જણાવ્યું કે 'આ એક ખાસ કેસ છે, જયાં આરોપીને ૨૦ વર્ષ જૂના આરોપમાં ધરપકડ કરવામાં આવી હોય.'