Gujarati News

બેંગલુરૂ,તા. ૨૨:  કર્ણાટક પરિવહન વિભાગના ઈતિહાસમાં પહેલી વખત ફેન્સી નંબર (KA-01-MV-0001) નંબર માટે ૧૦ લાખ રૂપિયાની બોલી લગાવાવમાં આવી છે.

સોમવારે પરિવહન વિભાગ દ્વારા હરાજી હાથ ધરવામાં આવી હતી. જેમાં શહેરના રહેવાસી ગુલામ મસ્તપાએ પોતાની મર્સિડિઝ બેન્ઝ માટે આ ફેન્સી નંબર (૦૦૦૧) ૧૦ લાખ રૂપિયામાં બોલી લગાવીને મેળવ્યો હતો. આ બોલીમાં ૭૫ હજાર રૂપિયાની ડીપોઝિટનો પણ સમાવેશ કરવામાં આવેલો છે જે નોન રિફન્ડેબલ હોય છે.

આ અંગે એક અધિકારીએ જણાવ્યું છે કે, 'કોરામંગલ માટે અમે KA-01-MV સીરીઝ માટે આ હરાજીનું આયોજન કર્યું હતું. આટલી મોટી બોલી લાગી તે દર્શાવે છે કે હાલના આર્થિક કટોકટીના સમયમાં પરિસ્થિતિ ધીરે ધીરે સામાન્ય બની રહી છે.'

આ ઉપરાંત હરાજીમાં વધુ બોલી લગાવનારાઓમાં ભરત કુમાર રેડ્ડી કે જેમણે ૩.૪ લાખ રૂપિયામાં ૯૯૯૯ નંબર મેળવ્યો જયારે જે ક્રિષ્ના રેડ્ડીએ ૩ લાખ રૂપિયામાં ૦૦૦૯ નંબર અને ચંદન રેડ્ડીએ ૧.૩ લાખ રૂપિયામાં ૦૯૯૯ નંબર મેળવ્યો છે. પરિવહન વિભાગને આ હરાજીમાં ૧૫ સફળ બિડરો પાસેથી ૨૯.૫ લાખ રૂપિયાની વસૂલાત કરી હતી. ફેન્સી નબંરની માંગ સૌથી વધારે રાજકારણી, ફિલ્મ સ્ટાર અને રિયલ એસ્ટેટના લોકો પોતાની લકઝરી કાર માટે લગાવે છે.