રાજકોટ
News of Monday, 26th October 2020

શકિત સોસાયટીમાં ઇમીટેશનના કારખાનામાં થયેલી ૪૭ હજારની ચોરીનો ભેદ ઉકેલાયોઃ ચાર પકડાયા

કિશન, અશ્વીન, શાહરૂખ અને પરેશ ચોરાઉ માલ વેંચવા આવ્યાને બી ડીવીઝન પોલીસે દબોચ્યાઃ ચારેયની ધરપકડ : સાગર અને શૈલેષની શોધ

રાજકોટ, તા., ૨૬: મોરબી રોડ જય જવાન જય કિશાન સોસાયટી પાસેથી ઇમીટેશનનો ચોરાઉ માલ વેંચવા નીકળેલા ચાર શખ્સોને બી ડીવીઝન પોલીસે પકડી લીધા હતા.

મળતી વિગત મુજબ મોરબી રોડ ભગવતી હોલ પાછળ આવેલ શકિત સોસાયટીમાં આવેલા કારખાનાની ઓફીસમાંથી પંદર દિવસ પહેલા થયેલી રૂ.૪૭ હજારના ઇમેટેશનના માલમતાની ચોરી થઇ હતી. આ માલ તસ્કરો વેંૅચવા આવવાના હોવાની બી ડીવીઝન પોલીસ મથકના કોન્સ. હેમેન્દ્રભાઇ વાઘીયા, પરેશભાઇ સોઢીયા અને સીરાજભાઇ ચાનીયાને બાતમી મળતા પીઆઇ એમ.બી.ઔસુરાના માર્ગદર્શન હેઠળ પીએસઆઇ એમ.એફ.ડામોર, એએસઆઇ વીરમભાઇ ધગલ, સલીમભાઇ માડમ, હેડ કોન્સ. અજયભાઇ બસીયા, મનોજભાઇ, સીરાજભાઇ ચાનીયા, જયદીપસિંહ બોરાણા, હેમેન્દ્રભાઇ, ભાવેશભાઇ, પરેશભાઇ, મનોજભાઇ, મિતેશભાઇ તથા ચાપરાજભાઇ સહીત મોરબી રોડ પર વોચમાં હતા. દરમ્યાન જય જવાન જય કિશાન સોસાયટીની પાછળથી પસાર થતી જીજે-૩-બીયુ-૮૭૯૧ નંબરની રીક્ષાને શંકાના આધારે રોકી રીક્ષાચાલક અને પાછળ બેઠેલા ત્રણ શખ્સોની પુછપરછ કરતા ચારેયે પોતાના નામ કિશન ભાવેશભાઇ ભાલારા (ઉ.વ.ર૦) (રહે. ગંજીવાડા મેઇન રોડ), અશ્વીન ગોવીંદભાઇ લીંબડીયા (ઉ.વ.૧૯) (રહે. ગંજીવાડા શેરી નં. ૩૬), શાહરૂખ મુનીર મહંમદભાઇ કુરેશી (ઉ.વ.રર)(રહે. ગંજીવાડા શેરી નં. ૬૩) અને પરેશ મનસુખભાઇ પરમાર (ઉ.વ.૧૯) (રહે. ગંજીવાડા શેરી નં. ૩૬) નામ આપ્યા હતા. પોલીસે તલાશી લેતા રીક્ષામાંથી પ્લાસ્ટીકના કોથળા મળી આવ્યા હતા. તેમાં ઇમીટેશનનો માલ હોઇ, આ માલ વિશે પુછપરછ કરતા તા.૧૩ના રોજ ભગવતી હોલ પાસે આવેલી શકિત સોસાયટીમાં આવેલા કારખાનાની ઓફીસમાંથી ચોરી કર્યાની કબુલાત આપતા ચારેયની ધરપકડ કરી હતી. પકડાયેલો અશ્વીન લીંબડીયા એક વર્ષ પહેલા તે ઇમીટેશનના કારખાનામાં કામ કરતો હતો. પુછપરછ દરમ્યાન સાગર અને શૈલેષના નામ ખુલતા બંનેની શોધખોળ હાથ ધરી છે.

(3:33 pm IST)