Gujarati News

નવી દિલ્લીઃ લગ્નને લઈને બોલિવુડનો બેચલર બોય સલમાન ખાન હંમેશા ચર્ચામાં રહે છે. હાલમાં જ કેટરિના કૈફના લગ્ન થયા હતા. ત્યાર બાદ ફેન્સને અભિનેતાની એટલી ચિંતા થવા લાગી કે કેટલાક લોકોએ દબંગ ખાનનું નામ વિદેશી યુવતી સાથે જોડી દીધું. બોલીવુડમાં અને ચાહકોમાં હાલ એવું ચર્ચાઈ રહ્યું છેકે, આ વિદેશી રૂપસુંદરી સામંથા લોકવુડ સાથે બોલીવુડના ભાઈજાન નિકાહ પઢીને લાઈફમાં સેટ થઈ શકે છે. બન્ને વચ્ચે સ્ટ્રોંગ રિલેશન હોવાનું પણ ચર્ચામાં છે.

બોલિવૂડના ભાઈજાન એટલે કે સલમાન ખાનનું નામ કોઈને કોઈ વ્યક્તિ સાથે જોડાઈ જાય છે. હાલમાં જ કેટરિના કૈફના લગ્ન થયા છે અને તે પછી ચાહકો માત્ર સલમાન ક્યારે લગ્ન કરશે તેની રાહ જોઈ રહ્યા છે. જો કે આ દિવસોમાં યુલિયા અને કેટરિના પછી બીજી વિદેશી યુવતીની ચર્ચાનું કેન્દ્ર બની છે.

હવે કોની સાથે જોડાયું સલમાનનું નામ-

સલમાન ખાનની લવ લાઈફ અવારનવાર ચર્ચામાં રહે છે. ઘણી અભિનેત્રીઓ સાથે સલમાન ખાનના લિંક-અપના અહેવાલો સામે આવી ચૂક્યા છે.પરંતુ અભિનેતાએ હંમેશા પોતાને સિંગલ જ ગણાવ્યો છે. જો કે હાલમાં સલમાન ખાનનું નામ હોલિવૂડ એક્ટ્રેસ સામંથા લોકવુડ સાથે જોડાઈ રહ્યું છે. બંનેના સંબંધ હોવાના સમાચાર ટોક ઓફ ધ ટાઉન બની રહ્યા છે.

સામંથા લોકવુડે શું કહ્યું-

સામંથા લોકવૂડે બોલિવૂડ હંગામાને આપેલા તેના નવા ઈન્ટરવ્યુમાં સલમાન સાથેના તેના સંબંધો અંગે મૌન તોડ્યું હતું. અને કહ્યું કે મને લાગે છે લોકો વધુ પડતી વાતો કરે છે. મને એવું પણ લાગે છે કે કંઈ ન હોય ત્યારે પણ લોકો ઘણી વાતો ફેલાવે છે. હું સલમાનને મળી છું, તે ખૂબ જ સરસ વ્યક્તિ છે. આટલી જ વાત છે. તેમ છતાં મને સમજાતું નથી કે લોકોને આટલા બધા વિચારો ક્યાંથી આવે છે.

સામંથાને પસંદ છે 'સુલતાન'-

સામંથા લોકવુડે કહ્યું કે હું સલામનને મળી, હું હૃતિક રોશનને મળી. પરંતુ હૃતિક અને મારા વિશે કોઈએ કંઈ કહ્યું નહીં. ત્યારે મને એ સમજાતું નથી લોકો આવી અફવા ક્યાંથી ફેલાવે છે. જો કે સામંથા લોકવુડે ઈન્ટરવ્યુમાં એ વાતનો સ્વીકાર કર્યો કે તેને સલમાનની ફિલ્મ 'સુલતાન' ખુબ જ પસંદ છે. સુલતાન તેની ફેવરિટ બોલિવૂડ ફિલ્મ છે.

સલમાનની બર્થડે પાર્ટીમાં આપી હતી હાજરી-

સામંથા લોકવુડ થોડા દિવસો પહેલાં પનવેલ ફાર્મ હાઉસમાં સલમાનની બર્થડે પાર્ટીમાં જોવા મળી હતી. પાર્ટી વિશે વાત કરતા સામંથા લોકવુડે કહ્યું કે તે સલમાનને પાર્ટીમાંથી જ ઓળખે છે, જો કે તે પહેલા પણ 2-3 વખત સલમાનને મળી ચૂકી છે. એટલા માટે તે માત્ર સલમાનને જ ઓળખતી હતી. તેણે એમ પણ કહ્યું કે તેણે સલમાનની બર્થડે પાર્ટીમાં બાકીના લોકો સાથે પણ ઓળખાણ કરી. તેણે પાર્ટીમાં હાજર દરેકના વખાણ પણ કર્યા. તમને જણાવી દઈએ કે ગયા મહિને જ્યારે સામંથા લોકવુડ મુંબઈ આવી હતી ત્યારે તે હૃતિક રોશનને મળી હતી. તેણે તેના ઈન્સ્ટાગ્રામ હેન્ડલ પર રિતિક સાથેનો ફોટો પણ શેર કર્યા હતા.