Gujarati News

મુંબઈ,તા. ૧૮ : તારક મેહતા કા ઉલ્‍ટા ચશ્‍મામાં ઘણા પાત્રો બદલાઈ ગયા છતાં હજુ તેની લોકપ્રિયતા જળવાયેલી રહી છે. જોકે, તેમાં હવે પહેલા જેવો રંગ નથી જામતો તેવી પણ ફરિયાદો દર્શકો કરી રહ્યા છે. દર્શકો પર પોતાની પકડ જમાવી રાખવા સતત ઝઝૂમી રહેલા આ શોના ફેન્‍સને ચિંતા કરાવે તેવી વાત સામે આવી છે. અહેવાલ મુજબ, તારક મેહતાના ઉલ્‍ટા ચશ્‍માના ચંપક ચાચા એટલે કે, અમિત ભટ્ટ શુટિંગ દરમિયાન ઈજાગ્રસ્‍ત થઈ ગયા છે.

તારક મેહતાના ઉલ્‍ટા ચશ્‍મામાં ચંપક ચાચાનું પાત્ર નિભાવતા અમિત ભટ્ટ શૂટિંગ દરમિયાન ઈજા થયા પછી ડોક્‍ટરે તેમને સંપૂર્ણ બેડ રેસ્‍ટ કરવાની સલાહ આપી છે. તેઓ હાલમાં શોનું શૂટિંગ નથી કરી રહ્યા.

રિપોર્ટમાં શોના સૂત્રોને ટાંકીને જણાવાયું છે કે, એક સીન માટે અમિત ભટ્ટને ભાગવાનું હતું, પરંતુ ભાગવા દરમિયાન તેમણે પોતાનું બેલેન્‍સ ગુમાવી દીધું અને તેઓ પડી ગયા હતા. પડવાના કારણે તેમને ઘણી ઈજા થઈ હતી. તેઓ શૂટિંગ પણ નથી કરી રહ્યા. ડોક્‍ટરે તેમને આરામ કરવાની સલાહ આપી છે.

શોના મેકર્સે અમિત ભટ્ટને આરામ કરવા માટે કહ્યું છે. આ શોના બધા એક્‍ટર્સ ચંપક ચાચા ઘાયલ થવાથી ચિંતિત છે અને જલદી સાજા થવાની પ્રાર્થના કરી રહ્યા છે.

તારક મેહતા કા ઉલ્‍ટા ચશ્‍મા એ ભારતીય ટેલીવિઝન પર સૌથી લાંબા ચાલનારા શોમાંથી એક છે અને તેના પાત્રોને દુનિયાભરના લોકો પસંદ કરી રહ્યા છે. અમિત ભટ્ટ ઉર્ફે ચંપક ચાચા આ શોનું એક ઘણું લોકપ્રિય પાત્ર છે અને તેમનું તેમના ઓન-સ્‍ક્રીન પુત્ર જેઠાલાલ (દિલીપ જોશી) સાથેનું બોન્‍ડિંગ બધાને ઘણી મજા કરાવે છે. અમિત આ શોનો શરૂઆતથી જ ભાગ રહ્યા છે અને બધાની સાથે સારા સંબંધો ધરાવે છે. જોકે, ઘણાને જાણ નહીં હોય કે, રિયલ લાઈફમાં અમિત ભટ્ટ તેમના ઓન-સ્‍ક્રીન પુત્ર દિલીપ જોશી કરતા ઉંમરમાં નાના છે.

આ શોએ તાજેતરમાં જ ૧૪ વર્ષ પૂરા કર્યા છે અને સેટ પર તેની કેક કટિંગ સેરેમની પણ યોજાઈ હતી. તાજેતરમાં જ આ શોમાં સચિન શ્રોફની તારક મેહતાના પાત્ર તરીકે એન્‍ટ્રી થઈ છે. આ પત્ર પહેલા શૈલેષ લોઢા ભજવતા હતા. તારક મહેતા કા ઉલ્‍ટા ચશ્‍મા ઉપરાંત અમિત ભટ્ટે સીઆઈડી, ખિચડી અને એફઆઈઆર જેવી સીરિયલ્‍સમાં પણ કામ કર્યું છે.