રિલીઝ થયો ફિલ્મ ‘શેરશાહ’ નું ટ્રેલર : જોવા મળી વિક્રમ બત્રાની બહાદુરીની ઝલક

મુંબઈ: સિદ્ધાર્થ મલ્હોત્રા અને કિયારા અડવાણીની આગામી ફિલ્મ ‘શેરશાહ’ નું ટ્રેલર રવિવારે સાંજે લોન્ચ કરવામાં આવ્યું હતું. આ ફિલ્મ ઓટીટી પ્લેટફોર્મ પર રિલીઝ થવાની છે અને નિર્માતાઓએ ફિલ્મની રિલીઝ ડેટની ઘોષણા કરી ત્યારથી જ પ્રેક્ષકો ફિલ્મની ઝલક મેળવવા તલપાપટ છે. નિર્માતાઓએ રવિવારે ફિલ્મનું ટ્રેલર રિલીઝ કર્યું હતું. આ આગામી ફિલ્મની વાર્તા કારગિલ યુદ્ધના હીરો કેપ્ટન વિક્રમ બત્રાના જીવન પર આધારિત છે. અભિનેતા સિદ્ધાર્થ મલ્હોત્રાએ તેના સોશ્યલ મીડિયા પર ફિલ્મનું ટ્રેલર શેર કર્યું છે. ટ્રેલર શેર કરતાં તેણે કેપ્શન લખ્યું, "શેરશાહ ટ્રેલર! કેપ્ટન વિક્રમ બત્રાએ ડ્યુટી પર રિપોર્ટિંગ. આખરે રાહ પૂરી થઈ છે. અમારા કારગિલ યુદ્ધના હીરોની વાર્તા રજૂ કરવામાં ગર્વ છે. શેરેશાહ 12 મી ઓગસ્ટે એમેઝોન પ્રાઇમ વિડિઓ પર રજૂ થશે જય હિંદ. "