Gujarati News

સુરત, તા.૩૦ : આપણાં સમાજમાં કેટલાક એવા કિસ્સા સામે આવતાં હોય છે જેના અંગે જાણીને લાગે કે જાણે માણસાઈ મરી પરવારી છે. સમાજમાં કેટલિક બદીઓના કારણે ઘણીવાર કોઈપણ અશુભ કાર્ય માટે સ્ત્રીને જવાબદાર ઠેરવીને તેના પર ત્રાસ ગુજારવામાં આવતો હોય છે. તેમાં પણ જ્યારે કોઈ સ્ત્રીનો પતિ નાની ઉંમરમાં મૃત્યુ પામે અને સાસરિયા દ્વારા આ બાબતે તેના પર ત્રાસ ગુજારવામાં આવે ત્યારે સ્ત્રી લાચાર બની જતી હોય છે. જોકે આવા એક કેસમાં કોર્ટે દાખલારુપ ચુકાદો આપ્યો છે.

બનાવની વિગત મુજબ સુરત શહેરના ઘોડદોડ રોડ ખાતે રહેતા યુવકનું અવસાન થતાં તેની પત્ની અને પુત્રીનો સાસરિયાએ સ્વીકાર ન કરતાં બંનેના ભરણપોષણ માટે પત્નીએ રહેઠાણ સહિતની વ્યવસ્થા માટેની અરજી કરી હતી. કોર્ટે સાસુ અને દિયરને મહિને ૫ હજાર ચૂકવવા હુકમ કર્યો હતો. સામાન્ય રીતે પત્ની-પતિના ઝઘડામાં પતિ સામે જ ભરણપોષણની અરજી થતી હોય છે. પરંતુ પીડિતાએ પતિના મોત બાદ કોર્ટમાં તેના સાસરિયા વિરુદ્ધ કેસ કરીને ભરણપોષણની માગણી કરી હતી.

અરજદાર પત્ની લગ્ન બાદ સંયુક્ત કુટુંબમાં રહેતા હતા પરંતુ પતિના સાસરિયાઓ સાથે મિલકતના ઝઘડાં થતા ભાડાના મકાનમાં રહેવા ગયા હતા. દંપતિને બાળક ન થતાં તેઓએ એક પુત્રી દત્તક લીધી હતી. આ દરમિયાન હાર્ડ એટેકથી પતિનું મોત થયું હતુ જેથી ભરણપોષણની જવાબદારી પત્ની પર આવી ગઈ હતી. બીજી તરફ સાસરિયાઓએ પણ વહુ અને દીકરીનો સ્વીકાર કર્યો નહતો. ઉપરાંત મિલકતમાંથી પણ ભાગ આપ્યો નહતો. આથી અરજદારે પોતાના વકીલ મારફત કોર્ટમાં અરજી કરી હતી.

કોર્ટે પહેલાં તો સાસરિયા સાથેના સમાધાનનો રસ્તો અપનાવવા કહ્યું હતું. પરંતુ સાસારિયાઓ તરફે પોઝિટિવ રિપ્લાય નહીં આવતા કેસ આગળ ચાલ્યો હતો.

પત્નીએ પોતાના પતિના નામના વેરાબિલ સહિતના પુરાવા પણ રજૂ કરાયા હતા. જો કે, તેમ છતાં વિધવા અને તેમની પુત્રીને ઘરમાં રેહવા દેવાયા નહતા. તેવામાં ભાડાનું મકાન ખાલી કરવાની ફરજ પડતાં અરજદાર વિધવા અને અઢી વર્ષની પુત્રીએ પિતાના ઘરે રહેવાની ફરજ પડી હતી. જેથી મહિલાએ પિયરમાં રહી કેસ કરાયો હતો. સૂત્રો કહે છે કે સાસરિયાઓ જ્યાં રહે છે તે ઘર પતિના નામે હતું. બાદમાં તે સસરાના નામે કરી દેવાયુ હતુ.