અમદાવાદ, તા. ૩ : ફક્ત ૧૨ ધોરણ પાસ હર્ષવર્ધન પરમારને જોઈને કોઈ એમ ન કહી શકે કે આ ભેજાબાજે ૪૦ જેટલા દેશોના કુલ ૨૫૦૦૦ લોકો સાથે છેતરપીંડી આચરીને આશેર રુ. ૫ કરોડની કિંમતની વસ્તુઓ ખરીદી તેને સ્થાનિક માર્કેટમાં વેચી નાખી છે. આ સામાન્ય ભણેલા વ્યક્તિએ મોટા મોટા ખેરખાંને ચકરાવે ચડાવી દે તેવું ઓનલાઈન કૌભાંડ આચર્યું છે. છે. આલીશાન લાઈફ જીવવા માટે સમાન્ય પરિવારના આ નબીરાએ વિદેશમાં રહેતા લોકોના ડેબિટ અને ક્રેડિટ કાર્ડનો ઉપયોગ કરીને મોંઘી ફાઈવ સ્ટાર હોટેલોમાં રોકાવું, મિત્ર વર્તુળોમાં રોફ જમાવવા લેવીશ પાર્ટીઓનું આયોજન જેવા મોંઘા ખર્ચ પાછળ લાખો રુપિયા પણ ખર્ચ કર્યા છે. આ બધા મોજશોખ તેણે બીજાના રુપિયાથી કર્યા છે અને તે લોકોને ખબર પણ નથી પડી.
શહેરના ઇસનપુર વિસ્તારમાં રહેતા ૨૧ વર્ષના લબરમૂછિયા યુવકે ૧૦૦ દિવસમાં જ આ ૨૫૦૦૦ જેટલા લોકોને છેતરીને રુ. ૫ કરોડનો ચૂનો ચોપડ્યો છે જોકે તેણે આ કરામત એટલી સિફતપૂર્વક કરી છે કે તેની જાળમાં ફસાયેલા વ્યક્તિને ભાગ્યે જ ખબર પડે છે કે તેના રુપિયા સાથે આખરે થયું શું? ઇસનપુરના નારાયણ નગરમાં પોતાના દહાડી મજુર પિતા અને કોર્પોરેશનની હોસ્પિટલમાં નર્સ તરીકે ફરજ બજાવતી માતા સાથે રહેતા આ યુવકની સાયબર સેલ દ્વારા ૩ મહિના પહેલા ધરપકડ કરવામાં આવી હતી.
પોલીસને એક ઇનપુટ મળ્યું હતું કે અમદાવાદમાંથી કોઈ પરંપરાગત ઇન્ટરનેટ સર્વિસના એક્સેસને બાયપાસ કરીને ડાર્ક વેબ એક્સેસ કરી રહ્યું છે. જ્યાં તે વિદેશી નાગરીકો સાથે છેતરપીંડી કરીને મોંઘા સામાનની ખીરદી કરી રહ્યું છે. પોલીસે કહ્યું કે કેટલાક સર્વેલન્સ પછી જ્યારે પરમારે પોતાના ઘરની નજીકના સ્થળે ૩૦ રેફ્રિજરેટરો મંગાવ્યા ત્યારે તેમણે છટકું ગોઠવ્યું અને ડિલીવરી બોય્ઝ તરીકે ઓળખ આપીને પોલીસે પરમારને પકડી પાડ્યો હતો. જે બાદ ગુનો આચરવાની તેની મોડસ ઓપરેન્ડી પોલીસના સાયબર સેલ સામે આવી જેને જોઈને મોટા મોટા નિષ્ણાંતો પણ માથું ખંજવાળતા રહી ગયા હતા.
૨૧ વર્ષનો છોકરો કોલેજ તો નહોતો ગયો પંરતુ હર્ષવર્ધન પરમાર માટે લેવિશ લાઈફસ્ટાઈલ જીવવા આ ટેક્નોલોજી મદદગાર પૂરવાર થઈ હતી. ટેક્નોલોજીની મદદથી તે ધીરે ધીરે ડાર્ક વેબમાં ઉતરતો ગયો અને ત્યાંથી તેને વિદેશી નાગરીકો સાથે છેતરપીંડી કરવાનો આ આઈડિયા આવ્યો. જેના દ્વારા તેણે દુનિયાના જુદા જુદા દેશમાં ૨૫૦૦૦ લોકોને છેતરીને રુ. ૫ કરોડથી પણ વધુનો ચૂનો ચોપડ્યો છે. જો પોલીસે તેની ધરપકડ કરી ન હોત તો તે હજુ પણ આગળ વધ્યો હોત.
પોલીસે તેની પાસેથી ડોલર ૨૦૦૦૦ એટલે કે ૧૫ લાખી કિંમતનું લેપટોપ પણ જપ્ત કર્યું છે. તેની પાસેથી મળેલા આ લેપટોપનું એનાલિસીસ કરીને સાયબર નિષ્ણાંતોએ જાણ્યું કે આ ગઠિયાએ અમેરિકા, યુકે, જાપાન, ફ્રાન્સ, ઓસ્ટ્રેલિયા અને ઘાના સહિત ૪૦થી વધુ દેશના લોકો સાથે સ્કેમ કર્યું છે.
વધુ માહિતી આપાતાં પોલીસે જણાવ્યું કે પરમાર ક્રેડિટ અને ડેબિટ કાર્ડ વિગતો ખરીદતો હતો - રશિયન હેકરો દ્વારા ચલાવવામાં આવતી વેબસાઇટ્સ પરથી કાર્ડ નંબર, સીવીવી અને એક્સપાયરી ડેટ વગેરે મેળવતો હતો. તે કાર્ડધારકના ખાતામાં રહેલી રકમ અને બેંક કયા દેશમાં આવેલી છે તેના આધારે આ હેકર્સને ૧૦ ડોલર (આશરે રુ. ૭૫૦) થી ૧૦૦ ડોલર (આશરે રુ. ૭૫૦૦) સુધીની ચુકવણી કરતો હતો.
પોલીસે જણાવ્યું હતું કે પરમારે કબૂલાત કરી હતી કે પાકિસ્તાનના ઝિયા મુસ્તુફા દ્વારા તેને પૈસા કમાવવાના વ્યવસાય તરીકે આ આઇડિયા મળ્યો હતો. જે તેને બાદમાં સાયબર ક્રાઈમ તરફ દોરી ગયો હતો. "પરમારે કહ્યું કે ઝિયા સાથે સંપર્ક તેને સોશ્યલ મીડિયા દ્વારા થયો હતો. ઝિયાએ તેને ડાર્ક વેબ અંગે માહિતી આપી હતી. જે હવે સાયબર ગુનેગારો દ્વારા ઓનલાઇન નાણાકીય ગુના કરવા માટે સલામત ચેનલ તરીકે પસંદ કરવામાં આવે છે.
પોલીસે વધુમાં જણાવ્યું કે "એવા દેશો છે જ્યાં બેંક ખાતાધારકોને વ્યવહાર કરતા પહેલા વન-ટાઇમ પાસવર્ડ (ઓટીપી) પ્રાપ્ત થતો નથી. પરમારે આવા દેશોના કાર્ડની વિગતો ખરીદી હતી. તેમણે ભારતીય બેંકોના કાર્ડ્સ હોલ્ડરને ટાળ્યા હતા કારણ કે ગ્રાહકોને ટ્રાન્ઝેક્શન અંગે ઓટીપી અથવા એસએમએસ મોકલવામાં આવે છે. પોલીસે વધુમાં કહ્યું *એકવાર તે કાર્ડની વિગતો મેળવે પછી પરમાર એકાઉન્ટની તમામ રકમ ખાલી થઈ જાય ત્યાં સુધી તેને વાપરતો હતો. તે આ રકમથી પ્રીમિયમ પ્રોડક્ટ અને સેવાઓ ખરીદતો હતો.
કાર્ડની ડિટેલ સાથે તે ડાર્ક વેબ પર જતો અને રુ. ૧ લાખથી વધુ કિંમતના લક્ઝરી ફોન, ઇલેક્ટ્રોનિક્સ અને ઇલેક્ટ્રિકલ ઉપકરણો તેમજ સોનાના સિક્કા અને ડાયમંડ જ્વેલરી ખરીદવા માટે કાર્ડનો ઉપયોગ કરતો. પોલીસે માહિતી મળી છે કે એકવાર ખરીદેલી વસ્તુ મળે એટલે તે આ પ્રોડક્ટ દુકાનદારો અને મોલના માલિકોને રોકડમાં વેચી દેતો.
આ ઉપરાંત કાર્ડનો ઉપયોગ તે મોંઘા રેસ્ટોરાંમાંથી ફુડ ઓર્ડર આપવા માટે પણ કરતો હતો. તે લગભગ ૫૦૦-૫૦૦ લોકોની પાર્ટી આયોજીત કરતો હતો. જેમાં એક વ્યક્તિ દીઠ રુ. ૧૦૦૦થી રુ. ૫૦૦૦ જેટલો ખર્ચ થતો હતો. પોલીસે કહ્યું, તેણે દિલ્હી, મુંબઇ અને ગોવાની પણ ઘણી ટ્રીપ કરી હતી. જ્યાં તે અને તેના મિત્રો ફાઇવ સ્ટાર હોટલોમાં રોકાયા હતા. તેઓએ આંતરરાષ્ટ્રીય એસ્કોર્ટ સેવાનો પણ લાભ લીધો હતો. આવી એક ટ્રીપ પાછળ તેઓ ૫થી ૧૦ લાખ રુપિયા ખર્ચ કરતાં હતાં.
પોલીસે જણાવ્યું હતું કે પરમારને સ્થાનિક કોર્ટથી જામીન મેળી ગયા છે, કારણ કે તેના પર છેતરપિંડીના કેસનો આરોપ મૂકાયો છે, જે જામીનપાત્ર ગુનો છે. જો કે, હજી સુધી કોઈ પીડિત ફરિયાદ નોંધાવવા માટે આગળ આવ્યું નથી. એમ તેણે ઉમેર્યું હતું.
.png)
છેલ્લા 8 દિવસમાં સૌથી લોકપ્રિય
મુખ્ય સમાચાર
સૌરાષ્ટ્ર કચ્છ
દેશ-વિદેશ
ખેલ-જગત
ફિલ્મ જગત