Gujarati News

Gujarati News

News of Wednesday, 4th August 2021

વડોદરામાં યુવક-યુવતી ડી-માર્ટમાં ચોરી કરતાં ઝડપાયા

બંન્ને એન્જિનિયરિંગનો અભ્યાસ કરતા હતા : યુવક અને યુવતીએ બેગનું લોક તોડી ચોકલેટ, શર્ટ, છત્રી, ડ્રાયફ્રુટના પેકેટ લેપટોપની બેગમાં મુકી દીધા હતા

 

વડોદરા, તા. : શહેરના માંજલપુર વિસ્તારમાં આવેલા ડી-માર્ટમાં ખરીદી કરવા માટે ગયેલા એન્જિનિયરિંગના એક વિદ્યાર્થી અને વિદ્યાર્થિની ચોરી કરતા સિક્યુરિટીના હાથે ઝડપાઇ જતાં તેઓ બંનેને માંજલપુર પોલીસને સોંપી દેવામાં આવ્યા હતા. એન્જિનિયરિંગના વિદ્યાર્થી અને વિદ્યાર્થિનીએ વાઘોડિયા રોડ પર આવેલા ડી-માર્ટમાં પણ ચોરી કરી હોવાની કબૂલાત કરી હતી.

જે અંગે પોલીસે વધુ તપાસ હાથ ધરી છે. પોલીસ સૂત્રોના જણાવ્યા અનુસાર, વડોદરાના માંજલપુર ડી-માર્ટમાંથી સામાન ચોરીને લેપટોપની બેગમાં સંતાડીને બહાર નીકળવાનો પ્રયાસ કરતા યુવક અને યુવતીને મેનેજરે ઝડપી પાડ્યા હતા.

તેઓની બેગમાંથી મળેલી વસ્તુઓનું બિલ માગતા તેમની પાસે બિલ નહોતું. યુવક જુઝર મુસ્તફા ચલ્લાવાલા (દાહોદ) તથા યુવતી ઓમીલા નબા નાગબમ (રહે. મણિપુર) હોવાનું જાણવા મળ્યું હતું. યુવક અને યુવતી વાઘોડિયા રોડની એક કોલેજના સિવિલ એન્જિનિયરિંગના બીજા વર્ષમાં સાથે અભ્યાસ કરે છે.

તેઓ હાલ કોલેજની હોસ્ટેલમાં રહે છે. ડી-માર્ટમાં જતાં પગેલા તેઓની બેગને કેબલથી લોક કરવામાં આવી હતી. પરંતુ, અંદર જઈને યુવક અને યુવતીએ તે લોક તોડી નાખી ચોકલેટ, શર્ટ, છત્રી, ડ્રાયફ્રુટના પેકેટ લેપટોપની બેગમાં મુકી દીધા હતા અને બેગ ફરીથી લોક કરી દીધી હતી. યુવક અને યુવતીને માંજલપુર પોલીસને સોંપી દેવામાં આવ્યા હતા. સિક્યુરિટી જવાનની ફરિયાદના આધારે પોલીસે યુવક અને યુવતી સામે ગુનો દાખલ કરી કાયદેસરની કાર્યવાહી હાથ ધરી છે.

પોલીસની પ્રાથમિક પૂછપરછમાં એવી વિગતો પ્રકાશમાં આવી છે કે, તેઓ બંનેએ વાઘોડિયા રોડ પર આવેલા ડી-માર્ટમાંથી પણ ચોરી કરી હતી. જે અંગે પાણીગેટ પોલીસ સ્ટેશનમાં અલગથી ગુનો દાખલ થયો છે. યુવક અને યુવતીએ મોજશોખ માટે ડી-માર્ટમાંથી ચોરી કરી હતી.

(9:45 pm IST)