Gujarati News

સુરત,તા.૯ : સુરત શહેરના અડાજણ વિસ્તારમાં કુટુંબના જ એક શખ્સે પરિણાતા પાછળના એક તરફી પ્રેમમાં પાગલ બનીને ના મોકલવાની વસ્તુનો ઓનલાઈન ઓર્ડર કરી નાખ્યો છે. કૌટુંબિક દિયરે પાગલપન છતું કરીને પરિણીતાને અંડર ગાર્મેન્ટ્સ ઓનલાઈન ઓર્ડર કરીને મોકલ્યા હતા.

પોતાનું નામ છતું ના થાય તે રીતે ઓનલાઈન ઓર્ડર કર્યા હતા, પરંતુ જ્યારે તપાસ થઈ ત્યારે કૌટુંબિક દિયરની કરતૂત વિશે જાણીને લોકોને જોરદાર ઝાટકો લાગ્યો હતો. આ મામલે ઓનલાઈન ઓર્ડર કરનારા ૩૯ વર્ષના બે બાળકોના પિતા સમીર હરીશચંદ્ર આઈસ્ક્રીમવાલા સામે ફરિયાદ નોંધાવવામાં આવી છે.

સ્થાનિક મીડિયા રિપોર્ટ્સ મુજબ શહેરના અડાજણ વિસ્તારમાં બનેલી આ ઘટનામાં ૪૦ વર્ષની પરિણીતાને વર્ષે ડિસેમ્બર મહિનામાં એક કુરિયર માટે એડ્રેસ પૂછવા માટે ફોન આવ્યો તો તેને આશ્ચર્ય થયું કે પોતે કોઈ ઓનલાઈન વસ્તુ ઓર્ડર કરી નથી તો શેની ડિલિવરી કરવાની વાત કરાઈ રહી છે? આ પછી પરિણીતાએ પોતે કોઈ વસ્તુ ઓર્ડર ના કરી હોવાનું કહીને ફોન કાપી નાખ્યો હતો, આ પછી તેમને જાન્યુઆરીમાં અને માર્ચ સુધી તેમને અલગ-અલગ કુરિયર બોયના ડિલિવરી એડ્રસ માટે ફોન આવતા હતા.

જ્યારે તેમના પાડોશી તેમના ઘરે આવ્યા અને કહ્યું કે તમે ઓનલાઈન ઓર્ડર કરો છો તમારા ઘરનું એડ્રસ કેમ નથી આપતા અને અમારા ઘરનું એડ્રસ આપો છો? આ સાંભણીને પરિણીતાને આશ્ચર્ય થયું કે જ્યારે તેણે ડિલિવરી બોયને કોઈ ઓનલાઈન ખરીદી કરી ના હોવાનું જણાવ્યું છતાં પાડોશીના ઘરે શા માટે પાર્સલ છોડવામાં આવ્યું છે! તેવું આશ્ચર્ય થતા પાર્સલમાં શું છે તે ચેક કરવા માટે પરિણીતાએ ખોલ્યું તો તેમાં મહિલાઓના અંડર ગાર્મેન્ટ્સ હતા. આ પછી પણ તેના ઘરે અલગ-અલગ પાર્સલ આવ્યા હતા જેમાં પણ અંડર ગાર્મેન્ટ્સ મોકલવામાં આવ્યા હતા.

જ્યારે પરિણીતાને અજાણી વ્યક્તિ તેને પરેશાન કરી રહી હોવાનું માલુમ પડ્યું ત્યારે તેણે કંપની પાસે ઓર્ડર કરનારનો ફોન નંબર માગ્યો હતો, કંપનીએ આઈપી એડ્રસ મોકલી આપ્યું હતું, જેના આધારે તેમણે સાઈબર ક્રાઈમમાં ફરિયાદ નોંધાવી હતી. ફરિયાદ બાદ પોલીસે તપાસ કરતા ઓનલાઈન ઓર્ડર કરનારી વ્યક્તિ સમીર હરિશચંદ્ર આઈસ્ક્રીમવાલા હોવાનું માલુમ પડ્યું હતું. જે પાલમાં આવેલા ગૌરવ પથ પર રહે છે.

પરણિતાને ઓનલાઈન ઓર્ડર કરીને અંડર ગાર્મેન્ટ્સ મોકલનારા સમીર નામના શખ્સને ઝડપી લઈને પૂછપરછ કરતા માલુમ પડ્યું છે કે તે પરિણીત છે અને બે બાળકોનો પિતા છે. સમીર માર્કેટિંગનું કામ કરતો હોવાનું પૂછપરછ સામે આવ્યું છે. હવે એક તરફી પ્રેમમાં પાગલ કૌટુંબિક દિયર સામે પોલીસ દ્વારા કાર્યવાહી કરવામાં આવી રહી છે.