Gujarati News

Gujarati News

News of Saturday, 10th July 2021

પિયર ગયેલી પત્નીને રસ્તા પર છરાથી હુમલો કરી પતાવી દીધી

વલસાડ જિલ્લાના ઉમરગામ તાલુકાના ફણસાની ઘટના : રીક્ષા ચાલક પતિના ત્રાસથી કંટાળીને પિયર આવી ગયેલી પત્નીને તેના સબંધીને ત્યાં જતા સમયે પતિએ રહેંસી નાખી

વલસાડ, તા.૧૦ : જિલ્લાના ઉમરગામ તાલુકાના ફણસા ગામમાં એક પતિએ તીક્ષ્ણ હથિયારોના ઘા ઝીંકી પોતાની પત્નીની કરપીણ હત્યા કરતાં સમગ્ર પંથકમાં ચકચાર મચી ગઇ છે. ફણસા ગામમાં છેવાડાના વિસ્તારમાં રહેતા પુનિત મિટનાની એજ ગામની મમતા મિટના નામની યુવતી સાથે લગ્ન થયા હતા. બનાવની વિગત મુજબ ઉમરગામ તાલુકાના કાંઠા વિસ્તારના ફણસા ગામે રહેતી મહિલા પતિના ત્રાસથી કંટાળી પિયર ચાલી ગયા બાદ પરત નહીં થતાં બંને વચ્ચે ચાલતા વિવાદનો ભયાનક અંત આવ્યો હતો.

ઘરથી સંબંધીના ઘરે નીકળેલી પત્નીને રસ્તામાં જોઇ તેના ઉપર છરાથી ઉપરાછાપરી હુમલો કરી પતિ ફરાર થઇ ગયો હતો. તેને સારવાર માટે હોસ્પિટલમાં લઇ જતાં સારવાર દરમિયાન તેણે દમ તોડી દેતાં આ અંગે પોલીસ ફરિયાદ નોંધાવાઈ હતી. ફણસા ગામે મીતનાવાડ ફળિયામાં રહેતા દલપતભાઈ વાસુભાઇ મીતનાએ શુક્રવારે મરીન પોલીસ મથકમાં ફરિયાદ નોંધાવી છે કે તેઓ બે દીકરી અને એક દીકરાના પિતા છે અને છેલ્લાં ૨૫ વર્ષથી દુબઈ ખાતે માછીમારી કરી પોતાનું ગુજરાન ચલાવે છે.

તેમની મોટી દીકરી મમતા ઉં.વ. ૩૦ના લગ્ન ગામમાં જ રહેતા અને રિક્ષાચાલકનું કામ કરતાં પુનિત ગાંડાભાઇ મીતના સાથે ૧૪ વર્ષ પહેલાં થયા હતા. એ દરમિયાન પુનિત અવારનવાર મમતા ઉપર વહેમ રાખી ઝઘડો કરતો હતો. પતિના ત્રાસથી કંટાળી મમતા છેલ્લા ૬ વર્ષથી બે સંતાનો સાથે પિયરે આવી ગઇ હતી.

ત્યાર બાદ મમતા ફરી સાસરે નહીં જતાં પતિ પુનિત સાથે અનેક વખત બોલાચાલી થઈ હતી. ગામમાં જ પિયર અને સાસરું હોવાથી બન્ને અવારનવાર સામસામે આવી જતાં હતાં. ત્યારે પતિ પત્નીને પરત સાસરે આવી જવા માટે કહેતાં તે ચોખ્ખી ના પાડી દેતી હતી, જેને લઈ અવારનવાર બન્ને વચ્ચે વિવાદ ચાલી રહ્યો હતો. તેવામાં ૮ જુલાઈના ગુરુવારે રાત્રે ૮ વાગે મમતા ફણસા બજાર ખાતે રહેતા કાકા ધનસુખ વાસુભાઈ મીતનાના ઘરે જાઉં છું એમ કહી ઘરથી નીકળી હતી.

એ દરમિયાન ફણસા માછીવાડ સુથાર ફળિયા રોડ ઉપર રિક્ષામાં આવેલા મમતાના પતિ પુનિત ગાંડાભાઇ મીતનાએ મમતાને અટકાવી તેના ગરદન, માથા અને હાથના ભાગે છરા વડે હુમલો કરી અનેક ઘા કરી ઇજાગ્રસ્ત કરી લોહી લોહાણ અને તરફડતી હાલતમાં મૂકી નાસી છૂટ્યો હતો.

ફણસામાં પત્ની મમતા ઉપર છરાથી હુમલો કર્યા બાદ આરોપી પતિ ફરાર થઇ ગયો હતો. ત્યારે મમતાનાં પરિવારજનો તેને ખાનગી કારમાં વાપીની હોસ્પિટલમાં લઇ ગયાં હતાં. કારમાં સારવાર માટે લઇ જતી વખતે ઇજાગ્રસ્ત મમતાએ તેના ઉપર થયેલા હુમલા અંગે પરિવારજનો સાથે વાત કરી હતી. મોત પહેલાં ઘવાયેલી હાલતમાં કરેલી વાતચીતના વીડિયો પરિવારે રેકોર્ડ કરી લીધો હતો.

પરિવારજનો મમતાને ખાનગી વાહનમાં સુવડાવી વાપીની ખાનગી હોસ્પિટલમાં લઈ ગયાં હતાં, જ્યાં સારવાર દરમિયાન મમતાનું મોત થયું હતું. પિતાએ નોંધાવેલી ફરિયાદના આધારે નારગોલ મરીન પોલીસે મમતાના હત્યારા પતિ પુનિત ગાંડાભાઇ મીતના વિરુદ્ધ હત્યાનો ગુનો નોંધી તેને પકડવાની તજવીજ હાથ ધરી છે.

(8:31 pm IST)