Gujarati News

Gujarati News

News of Monday, 12th February 2024

રાજયમાં એકજ શિક્ષકવાળી પ્રાથમિક શાળાઓમાં સત્‍વરે શિક્ષકો મૂકવામાં આવશેઃ શિક્ષણ મંત્રી ડો. કુબેરભાઈ ડિંડોર

RTE એક્‍ટ હેઠળ વિદ્યાર્થી દીઠ શિક્ષકની સંખ્‍યા ફાળવવામાં આવે છેઃ ૩૦ વિદ્યાર્થી દીઠ ૧ શિક્ષક અપાય છે

રાજકોટ તા.૧૨: રાજયના શિક્ષણ મંત્રી ડો. કુબેરભાઈ ડિંડોરે જણાવ્‍યું છે કે, ભૂલકાઓને પ્રાથમિક શિક્ષણ ઘર આંગણે જ પુરૂ પાડવા માટે રાજય સરકાર સતત પ્રયત્‍નશીલ છે. રાજયમાં એક જ શિક્ષક વાળી ૧૬૦૬ પ્રાથમિક શાળાઓ છે,જેમાં સત્‍વરે શિક્ષકો મૂકવામાં આવશે.

આજે વિધાનસભા ખાતે રાજયમાં એક જ શિક્ષક ધરાવતી પ્રાથમિક શાળાઓની વધુ શિક્ષકો મૂકવા અંગેના પ્રશ્નોના પ્રત્‍યુતરમાં મંત્રી શ્રી ડિંડોરે ઉમેર્યું કે, પ્રાથમિક શાળાઓમાં ભૂલકાઓનું શિક્ષણ બગડે નહીં એ માટે આવી શાળાઓમાં યોગ્‍ય લાયકાત ધરાવતા જ્ઞાન સહાયક મુકવાની પ્રક્રિયા હાથ ધરવામાં આવી છે. સાથોસાથ શાળાઓમાં વધઘટ કેમ્‍પનું આયોજન કરાય છે. જેમાં જિલ્લા ફેર અને જિલ્લાઓની આંતરિક બદલી કેમ્‍પનું આયોજન કરીને શિક્ષકોને વતનનો લાભ આપવાનો પ્રયાસ કર્યો છે. જેના પરિણામે આ ઘટ જોવા મળી રહી છે. તેમણે ઉમેર્યું કે, રાજયની પ્રાથમિક શાળાઓમાં શિક્ષકોની ફાળવણી RTE એક્‍ટ હેઠળ કરવામાં આવે છે. જેમાં ૩૦ વિદ્યાર્થી દીઠ ૧ શિક્ષકની ફાળવણી કરવામાં આવે છે. વિદ્યાર્થીઓની સંખ્‍યા ઓછી હોય તેવી શાળાઓ પણ વધુ છે. જેના પરિણામે એકજ શિક્ષક ધરાવતી પ્રાથમિક શાળાઓની સંખ્‍યામાં વધારો જોવા મળ્‍યો છે. સંખ્‍યા આધારિત શિક્ષકોની ભરતી સત્‍વરે કરવામાં આવશે તેમ, તેમણે ઉમેર્યું હતું

(4:50 pm IST)