Gujarati News

અમદાવાદ તા. ૧૨ : ઘાટલોડિયામાં રહેતા હંસલ ખત્રીના માતાપિતાએ કેનેડાની ફલાઈટની ટિકિટ ઉપલબ્ધ છે કે નહીં તે તપાસવાનું શરૂ કરતાં તેમને ઝટકો લાગ્યો. 'કેનેડાની પ્રતિષ્ઠિત યુનિવર્સિટીમાં બિઝનેસ મેનેજમેન્ટના પીજી ડિપ્લોમાં કોર્સમાં મને એડમિશન મળ્યું છે અને સેમેસ્ટર સપ્ટેમ્બરથી શરૂ થઈ રહ્યું છે. મારે ઓગસ્ટના છેલ્લા અઠવાડિયા સુધીમાં ત્યાં પહોંચી જવાનું છે,' તેમ હંસલ ખત્રીએ કહ્યું. હંસલની આખા કોર્સની ફી ૨૦ લાખ રૂપિયા છે, જયારે એર ઈન્ડિયા જેવી ફલાઈટ્સમાં કેનેડા જવાનું એક સાઈડનું ભાડું ૧.૭૫થી ૨ લાખ રૂપિયા છે- જે હંસલની કુલ ફીના ૧૦% જેટલું છે.

હંસલના પિતા અમિત ખત્રીએ કહ્યું, 'આ વર્ષે જાન્યુઆરીમાં ટિકિટના ભાવ ૫૦,૦૦૦થી ૭૦,૦૦૦ રૂપિયાની વચ્ચે હતા. એ વખતે પણ અમને ટિકિટ મોંઘી જ લાગી હતી પરંતુ કોરોનાની સ્થિતિને કારણે આમ હશે એવું માની લીધું હતું. હવે હવાઈ મુસાફરીના ભાડા ત્રણ ગણા વધી ગયા છે, જે અતિશય વધારે છે. અત્યારે ટ્રાવેલ કરનારા મોટાભાગના પેસેન્જરોમાં અભ્યાસ માટે વિદેશ જતાં વિદ્યાર્થીઓ છે. હંસલને એડમિશન મળી ગયું છે ત્યારે મોંઘી ટિકિટ ખરીદવા સિવાય અમારી પાસે કોઈ વિકલ્પ નથી પરંતુ આ અયોગ્ય છે.' તેમ ટાઇમ્સ ઓફ ઇન્ડિયાનો રિપોર્ટ જણાવે છે.

માત્ર વિદ્યાર્થીઓ જ નહીં રેગ્યુલર પેસેન્જરોને પણ ટિકિટના ભાવે ઝટકો આપ્યો છે. નારણપુરા વિસ્તારમાં રહેતા સુભાષ ઘોંચલાએ કહ્યું કે, તેમની પુત્રવધૂને અમદાવાદથી ટોરેન્ટો (કેનેડા) મોકલવાની એક સાઈડની ટિકિટ માટે તેમણે ૫ જુલાઈએ ૧.૭૭ લાખ રૂપિયા ખર્ચ્યા. ટિકિટનો આ ભાવ સરેરાશ ૭૦,૦૦૦ રૂપિયાની ટિકિટ કરતાં ત્રણ ગણો વધારે છે.

'રૂપિયા કરતાં પણ પુત્રવધૂ અને તેના નાના બાળકે વેઠેલી તકલીફ વધુ લાગે છે. તેમને સર્બિયાના બેલગ્રેડ થઈને ટોરેન્ટો જવું પડ્યું હતું. એટલું જ નહીં બેલગ્રેડમાં ૨ રાત્રિનું રોકાણ અને એક દિવસ RT-PCR ટેસ્ટ માટે ફરજિયાત છે. મતલબ કે, તે અમદવાદથી ટોરેન્ટો વાયા મુંબઈ-ફ્રેન્કફર્ટ-બેલગ્રેડ-ફ્રેન્કફર્ટ-ટોરેન્ટો, આ પ્રકારે પહોંચી', તેમ સુભાષ ઘોંચલાએ જણાવ્યું.

૨૧ વર્ષીય સંકેત પટેલ (નામ બદલ્યું છે)ના કહેવા અનુસાર, મે મહિનામાં બીજી લહેરના કારણે તેણે કેનેડા જવાનું મુલતવી રાખ્યું હતું. તેણે કહ્યું, 'મારા વિઝા ડિસેમ્બરમાં એકસપાયર થઈ જાય છે. હું ફલાઈટ ટિકિટમાં સસ્તી ડીલ મળી જાય તેના માટે હજી એક મહિનો રાહ જોઉં ત્યાં સુધીમાં કોરોનાની ત્રીજી લહેર આવી જાય અથવા કેનેડા પોતાના નિયમો બદલી નાખે તો શું કરવાનું? જોરદાર ચર્ચા ચાલી રહી છે કે, જુલાઈના છેલ્લા અઠવાડિયામાં કેટલીક કેટગરીમાં છૂટછાટ મળવાની જાહેરાત થઈ શકે છે પરંતુ આ હંમેશા જુગાર જેવું રહ્યું છે. વિઝા મળ્યા ત્યારે હું ખૂબ ખુશ થયો હતો પરંતુ આ ખુશી હવે ભયમાં ફેરવાઈ રહી છે.'

ટ્રાવેલ અને વિઝા કન્સલ્ટન્ટ સબિના અડવાણીએ કહ્યું કે, વિવિધ દેશોએ કોરોનાની સ્થિતિને ધ્યાનમાં રાખીને ચોક્કસ પરવનાગીઓ આપી છે અને તેના કારણે જ ટ્રાવેલિંગનો સમય અને મુસાફરોનો ખર્ચ વધ્યો છે. ખાસ કરીને વિદ્યાર્થીઓને મોંઘું પડી રહ્યું છે. 'કેનેડા જેવા દેશો ભારતીય RT-PCRને માન્ય નથી રાખતા. તેમણે કોઈ ત્રીજા દેશમાં જઈને RT-PCR રિપોર્ટ કરાવાનું ફરજિયાત કર્યું છે. USની વાત કરીએ તો, હાલ તમારે કોઈ ત્રીજા દેશની હોટલમાં ૧૪ દિવસ કવોરન્ટીન થવું પડે છે. અમને આશા છે કે, ૧૫ જુલાઈથી માલદીવ્સ અને દુબઈમાં જવાની મંજૂરી મળી જશે. આ બંને સ્થળોને ભારતીય મુસાફરો પ્રાથમિકતા આપે છે કારણકે ત્યાં ઈન્ડિયન ફૂડ સરળતાથી મળી રહે છે,' તેમ સબિના અડવાણીએ ઉમેર્યું.

હાલ આ પ્રકારના નિયમોના કારણે મુસાફરોને મેકિસકો, બેલગ્રેડ અને અર્મેનિયા થઈને જવું પડે છે. હાલ અહીં ૧૪ દિવસ કવોરન્ટીનમાં રહેવાનો અને ભોજનનો ખર્ચ થતો હોવાથી કન્ફર્મ ટિકિટના ભાવ ૧.૭૫ લાખ રૂપિયાથી વધી જાય છે.

અમદાવાદના જ એક સ્ટુડન્ટ વિઝા અને ઈમિગ્રેશન કન્સલ્ટન્ટ સમીર યાદવે કહ્યું, 'કેટલીક સાઈટ પરથી સસ્તી ટિકિટ મળી રહી છે. પરંતુ ટ્રાવેલર્સ તેને પસંદ નથી કરતાં કારણકે ઘણીવાર ફલાઈટ કેન્સલ થવાના ચાન્સ વધી જાય છે. કોરોનાના નિયંત્રણોને કારણે હાલ કેનેડા માટે કોઈ સીધી ફલાઈટ નથી અને તેના કારણે રૂટ લાંબો થઈ જાય છે. ટિકિટ રદ્દ કરાવી એ તો કેન્સલેશનની રકમ પાછી મળી જાય છે પરંતુ જે વિદ્યાર્થીઓને નિશ્ચિત સમય મર્યાદામાં કેનેડા પહોંચવાનું છે તેમના માટે આ સ્થિતિ મુશ્કેલ છે. મારી પાસે ઓછામાં ઓછા ૧૦ વિદ્યાર્થીઓ છે જે કેનેડા પહોંચવા માટે ટિકિટ ઉપલબ્ધ થાય તેની રાહ જોઈ રહ્યા છે.'