Gujarati News

વડોદરા, તા.૧૨ : વડોદરા જિલ્લાના વાઘોડિયા તાલુકાના કોટંબી ગામે જમવા બાબતે થયેલી બબાલમાં ઉશ્કેરાયેલા પિતાએ પોતાના જ દીકરાની નિર્મમ હત્યા કરી હોવાની ઘટના સામે આવતા પોલીસ દોડતી થઈ હતી. પ્રાપ્ત અહેવાલો અનુસાર, રાતે સૂઈ રહેલા દીકરાના ગળા પર કૂહાડીના ઘા ઝીંકીને હત્યા કરનારા બાપની પોલીસે ગણતરીના કલાકોમાં ધરપકડ કરી લીધી છે અને ગુનો નોંધીને કાયદેસરની કાર્યવાહી હાથ ધરી છે. કોટંબી ગામ સ્થિત નવી નગરીના રહેવાસી કૈલાસબેન કનુભાઈ પરમારે પોલીસ ફરિયાદમાં જણાવ્યું કે, તેમને સંતાનમાં બે છોકરા અને એક છોકરી છે. જેમાં છોકરી સૌથી મોટી અને તે બાદ રાજુ અને સૌથી નાનો રાકેશનો સમાવેશ થાય છે. ૧૦ સપ્ટેમ્બરના રોજ ઘરના સભ્યો જમવા બેઠા હતા. દરમિયાન પિતા અને રાકેશ વચ્ચે જમવા બાબતે બોલાચાલી થઈ હતી. જેમાં રાકેશે પિતાને લાતો મારી હતી. જો કે, મામલો શાંત થઈ જતા ઘરના બધા સભ્યો સૂઈ ગયા હતા.

દરમિયાન મધરાતે લાકડા ખખડવાનો અવાજ સાંભળતા માતા જાગી ગઈ હતી. ત્યારે રાકેશ સૂઈ રહ્યો હતો. જો કે પિતાએ સૂતેલા પુત્ર રાકેશના ગળા પર કુહાડી વડે એક નહીં પરંતુ ઉપરા-છાપરી અનેક ઘા ઘા ઝીંકીની મોતને ઘાટ ઉતારી દીધો હતો. દીકરાને લોહીલુહાણ હાલતમાં જોઈ માતા પડી ભાંગી હતી. પુત્ર રાકેશનું મોત થઈ ગયું છે તેવી જાણ થતાં માતાએ ગામના લોકોને બનાવ અંગે વાત કરી હતી. જેથી લોકો ઘટનાસ્થળે દોડી આવ્યા હતા અને પોલીસને ઘટના અંગે જાણ કરવામાં આવી હતી.

બનાવની જાણ થતાં વાઘોડિયા પોલીસનો કાફલો ઘટનાસ્થળે દોડી આવ્યો હતો અને માતા કૈલાસબેનની ફરિયાદના આધારે આરોપી પિતા કનુભાઈ સામે હત્યાનો ગુનો દાખલ કરીને વધુ તપાસ હાથ ધરી હતી. આ દરમિયાન પોલીસે ગણતરીના કલાકોમાં જ આરોપી પિતાની ધરપકડ કરીને કાયદેસરની કાર્યવાહી હાથ ધરી છે.