Gujarati News

વડોદરા, તા. ૧૨ : ઘણી વખત સામાન્ય ભૂલના કારણે મોટી તકલીફ ભોગવવાનો વારો આવતો હોય છે. બાઈકના ટાયરમાં કપડા ફસાઈ જવાના કારણે થતાં અકસ્માત જીવલેણ સાબિત થતાં હોય છે. આવી જ વધુ એક ઘટના વડોદરામાં બની છે જેમાં બાઈકમાં સાડીનો છેડો ફસાઈ જવાના કારણે મહિલાનું મોત થઈ ગયું છે. જ્યારે વડોદરામાં એક અન્ય અકસ્માતની ઘટના બની હતી જેમાં ૩૫ વર્ષના યુવાને જીવ ગુમાવ્યો છે. 

બનાવની વિગતો પ્રમાણે કરજણ તાલુકાના બોડકા ગામના જનકબેન ભદ્રસિંહ પરમાર બાઈક પર જઈ રહ્યા હતા. તેઓ બાઈકની બાછલી સીટ પર બેઠા હતા અને તેમનો સાડીનો છેડો બાઈકના ટાયરમાં આવી જવાના કારણે તેઓ રોડ પર ફસડાઈ પડ્યા હતા. આ ઘટનામાં તેમને ગંભીર ઈજાઓ થઈ હતી. જનકબેનને તાત્કાલિક દવાખાને ખસેડીને બચાવવાની કોશિશો કરવામાં આવી હતી પરંતુ માથામાં ગંભીર ઈજાઓ થવાના કારણે તેમનું સારવાર દરમિયાન મોત થયું હતું. આ ઘટનાને નજરે જોનારા લોકોને કંપારી છૂટી ગઈ હતી. આવી ઘટનાઓ અટકાવવા માટે બાઈક કે અન્ય ટુ-વ્હીલર પાછળ બેઠેલી મહિલાએ દુપટ્ટો, સાડી કે ઓઢણી પહેરી હોય તો ખાસ સાવધાની રાખવી જોઈએ.

અકસ્માતની વધુ એક ઘટના જિલ્લાના પાદરાના મુવાલ ગામે બની હતી જેમાં બાઈક લઈને રસ્તો ક્રોસ કરી રહેલા રમેશ જયંતિભાઈ પરમાર (૩૫)નું ટ્રક સાથે અકસ્માત થતા સારવાર દરમિયાન મોત થયું હતું. અકસ્માત બાદ ટ્રકના ડ્રાઈવરે સ્ટિયરિંગ પરથી કાબૂ ગુમાવી દીધો હતો જેના કારણે ટ્રક નજીકમાં આવેલી દુકાન સાથે અથડાઈ ગયો હતો.

રાત્રે દોઢ વાગ્યે થયેલા અકસ્માતમાં ગંભીર રીતે ઘાયલ થયેલા રમેશને ગંભીર ઈજાઓ થતાં સારવાર માટે ખસેડવામાં આવ્યો હતો જોકે ગંભીર ઈજાઓના કારણે સારવાર દરમિયાન અંતિમ શ્વાસ લીધા હતા.