Gujarati News

અમદાવાદ, તા.૧૨ : હાલમાં જ સંપન્ન થયેલ ટોક્યો ઓલિમ્પિક્સ અને પેરાલિમ્પિકમાં ભારતનું અને ગુજરાતનું નામ રોશન કરનાર ભાવિના પટેલ અને અંકિતા રૈનાને રાષ્ટ્રપતિના હસ્તે અર્જુન એવોર્ડથી સન્માનિત કરવામાં આવશે. આવતીકાલ એટલે કે શનિવારે રાષ્ટ્રપતિ દ્વારા ગુજરાતની બંને દીકરીઓને અર્જુન એવોર્ડ એનાયત કરવામાં આવનાર છે. ભાવિના પટેલે ટોક્યો પેરાલિમ્પિકમાં સિલ્વર મેડલ જીત્યો હતો, જ્યારે અંકિતા રૈનાએ ૨૦૧૮માં એશિયન ગેમ્સમાં બ્રોન્ઝ મેડલ જીત્યો હતો, અને ટોક્યો ઓલિમ્પિકમાં તે સાનિયા મિર્ઝા સાથે ડબલ્સ રમવા માટે ઉતરી હતી.

ટોક્યો પેરાલિમ્પિકમાં અમદાવાદની દીકરી ભાવિના પટેલે દેશનું નામ સમગ્ર વિશ્વમાં રોશન કર્યું હતું. ટેબલ ટેનિસના મહિલા સિંગલ્સમાં વર્ગ-૪ કેટેગરીમાં ભારતને પ્રથમ સિલ્વર મેડલ અપાવ્યો હતો. જે બાદ ગુજરાતના ગૃહ તેમજ રમતગમત અને યુવા સાંકૃતિક મંત્રી હર્ષ સંઘવીએ ભાવિનાના ઘરે જઈને તેમને ૩ કરોડનો ચેક આપી સન્માન કર્યું હતું.

ભાવિના પટેલ મૂળ મહેસાણા જિલ્લાના વડનગર તાલુકાના સૂંઢિયા ગામના વતની છે. તેમને ૪ વર્ષની ઉંમરે પોલિયો થયો હતો. જો કે મક્કમ મનોબળ સાથે ભાવિના પટેલે સ્નાતક સુધીનો અભ્યાસ કર્યો, સાથે-સાથે સ્પોર્ટ્સમાં નામના મેળવી. ભાવિના પટેલ ESIC (એમ્પ્લોયી સ્ટેટ ઇન્સ્યોરન્સ સ્કીમ)ના કર્મચારી છે. ૨૦૦૮થી તે ટેબલ ટેનિસ રમે છે. તેમના પિતા હસમુખ પટેલ સૂંઢિયા ગામમાં ખેતી તથા કટલરીની દુકાન ચલાવે છે, અત્યારે તેમના લગ્ન અમદાવાદમાં વેપાર કરતા નિકુલ પટેલ સાથે થયા છે.

ગુજરાતની અંકિતા રૈનાનો જન્મ અમદાવાદમાં થયો છે. તેમના પિતા રવિન્દર રૈના મૂળ કાશ્મીરના છે. અંકિતા રૈનાએ ૪ વર્ષની ઉંમરથી જ ટેનિસ રમવાનું શરૂ કરી દીધું હતું. વર્ષ ૨૦૧૮ની એશિયન ગેમ્સમાં અંકિતા રૈનાએ મહિલા સિંગલ્સમાં બ્રોન્ઝ મેડલ જીત્યો હતો. આ ઉપરાંત અંકિતાએ ઇન્ટરનેશનલ ટેનિસ ફેડરેશન સર્કિટમાં ૧૧ સિંગલ્સ અને ૧૭ ડબલ્સ ટાઇટલની સાથે ડબલ્સમાં એક ડબ્લ્યુટીએ ૧૨૫ કે (ઉ્છ ૧૨૫દ્ભ) શ્રેણી જીતી છે.