Gujarati News

અમદાવાદ,તા. ૧૫ : તેની સુરક્ષા માટે પોલીસ ચોવીસ કલાક તૈનાત રહેશે. બે મહિનામાં બે વાર અપહરણ થયેલ, તે ન તો રાજકારણ છે કે ન તો સેલિબ્રિટી. તે માત્ર બે મહિનાનું બાળક છે, જે ગાંધીનગરના અડાલજ વિસ્‍તારમાં રહે છે. ૨૪×૭ પોલીસ સુરક્ષા મેળવનાર આ બાળક ગુજરાતનો સૌથી નાની ઉંમરનો વ્‍યક્‍તિ હોઈ શકે છે.

બાળક, કે જેનો પરિવાર અડાલજ ત્રિમંદિર પાસેના સ્‍લમ વિસ્‍તારમાં રહે છે તેનું પહેલીવાર અપહરણ ત્‍યારે થયું હતું જયારે તે માત્ર બે દિવસનો હતો. તેને અપહરણકર્તાની જાળમાંથી છોડાવવામાં આવ્‍યો હતો, ૫મી જૂને અન્‍ય અપહરણકર્તાની જોડીએ ફરીથી તેને તેના માતા-પિતા પાસેથી છીનવી લીધો હતો.

જેમણે અપહરણ કર્યું હતું તે બંને અપહરણકર્તામાં એક વાત સામાન્‍ય એ હતી કે તેઓ નિઃસંતાન દંપતી હતા અને બાળકને લઈને પરિવાર પૂર્ણ કરવા માગતા હતા.

બે-બે વખત અપહરણ થતાં, પોલીસે સ્‍લમ વિસ્‍તાર નજીક એક સ્‍પેશિયલ પોઈન્‍ટ બનાવવાનું તેમજ એક ટીમને તૈનાત રાખવાનું નક્કી કર્યું છે. આ સિવાય, પોલીસ અધિકારીઓ બાળકના માતા-પિતાને કે જેઓ કચરો એકત્રિત કરીને ગુજરાત ચલાવે છે તેમને કાયમી ઘર આપીને બાળકને અપહરણકર્તાથી સુરક્ષિત રાખવાનું વિચારી રહ્યા છે.

ગાંધીનગરની લોકલ ક્રાઈમ બ્રાંચના ઈન્‍સ્‍પેક્‍ટર એચ.પી. જાડેજાએ કહ્યું હતું કે, ‘અમે છોકરાના માતા-પિતા માટે સારી નોકરી અને ઘર શોધવાનો પ્રયાસ કરી રહ્યા છીએ કે જેથી તેઓ સુરક્ષિત રહે'.

કરવામાં આવી રહેલી વ્‍યવસ્‍થા વિશે વાત કરતાં LCBના એક અધિકારીએ જણાવ્‍યું હતું કે, ‘અમે છોકરા અને તેના માતા-પિતા પર દેખરેખ રાખીશું. પછી ભલે તે ઘરે હોય કે કામ પર. બાળકની માતાને પોલીસના કેટલાક નંબર આપવામાં આવ્‍યા છે કે જેથી ઈમરજન્‍સી દરમિયાન તેની આસપાસ કોઈ પોલીસ ન હોય તો તે મદદ માટે કોલ કરી શકે'

અન્‍ય પોલીસકર્મીએ ઉમેર્યું હતું કે, ‘ઘણા એવા બાળકો છે જે તેમના માતા-પિતા સાથે ફૂટપાથ પર અથવા રસ્‍તા પર રહે છે. તેઓ અપહરણકર્તાઓ માટે સરળ ટાર્ગેટ હોય છે. આ કેસમાંથી પાઠ લઈને અમે આવા જ અન્‍ય બાળકોને સમાન રક્ષણ આપી શકીએ છીએ'.

એપ્રિલ મહિનામાં મહેસાણા જિલ્લાના કડીમાં રહેતા જીગ્નેશ અને અસ્‍મિતા ભારતીએ બાળક જયારે બે મહિનાનું હતું ત્‍યારે તેનું અપહરણ કર્યું હતું. નિઃસંતાન દંપતીએ ગાંધીનગરની સિવિલ હોસ્‍પિટલમાંથી બાળકને ઉઠાવ્‍યું હતું. ગાંધીનગર LCBએ તેમને ટ્રેક કર્યા હતા અને એક અઠવાડિયામાં બાળકનું રેસ્‍ક્‍યૂ કર્યું હતું.

બાદમાં, બાળકનું અપહરણ ૫મી જૂને બાંસવાડામાંથી થયું હતું, આ વખતે ફરીથી નિઃસંતાન દંપતીએ તેનું અપહરણ કર્યું હતું. આરોપીઓ દિનેશ અને સુધા કતારાના લગ્નજીવનને સાત વર્ષ થઈ ગયા હોવા છતાં તેમને કોઈ બાળક નહોતું. તેથી, દિનેશે જયારે જોયું કે માતા કામ કરતી વખતે પોતાના બાળકને સાયકલમાં બાંધેલા પારણામાં રાખી રહી છો તો તેણે ત્‍યાંથી બાળકને ઉઠાવ્‍યું હતું અને ભાગી ગયો હતો. LCBએ ચાર દિવસ લીધા હતા. તેમણે બાળકના રેસ્‍ક્‍યૂ માટે ગુજરાતના ગાંધીનગર, મહેસાણા, અરવલ્લી અને સાબરકાંઠા તેમજ રાજસ્‍થાનના બાંસવાડા જિલ્લાના ૭૦૦ સીસીટીવી કેમેરાના ફૂટેજ તપાસ્‍યા હતા.