Gujarati News

અમદાવાદ, તા.૧૪ : કોરોના મહામારીને કારણે આ વર્ષે વિદ્યાર્થીઓનું શિક્ષણ પર પણ ભારે અસર થઈ છે. તેવામાં ગુજરાત યુનિવર્સિટી દ્વારા ઓફલાઈન પરીક્ષા મોકૂફ રાખવાની જાહેરાત તથા શિક્ષણ વિભાગે પરીક્ષા સ્થગિત ન કરી હોવાની સ્પષ્ટતા કરતા વિદ્યાર્થીઓ મુંઝવણમાં મુકાઈ ગયા છે. યુનિવર્સિટી હવે ફરીથી ઓફલાઈન પરીક્ષાની નવી તારીખો જાહેર કરશે. મીડિયા રિપોર્ટ મુજબ સપ્ટેમ્બર-૨૦૨૦માં ગુજરાત યુનિવર્સિટીની ઓફલાઈન પરીક્ષા યોજાય તેવી શક્યતા છે. ઉલ્લેખનીય છે કે, આ પહેલા યુનિવર્સિટીએ ૨૧ ઓગસ્ટ અને ૩૧ ઓગસ્ટના રોજ ઓફલાઈન પરીક્ષા લેવાની જાહેરાત કરી હતી. મીડિયા રિપોર્ટ મુજબ પરીક્ષાઓ મોકૂફ કર્યા બાદ શિક્ષણ વિભાગે પરિપત્ર કરીને પરીક્ષા સ્થગિત કરવા માટે કોઈ સૂચના આપી ન હોવાની જાહેરાત કરીને સપ્ટેમ્બરમાં પરીક્ષા યોજવાની તાકીદ કરી છે.

              આમ ૨૧ અને ૩૧ ઓગસ્ટની ઓફલાઈન પરીક્ષા રદ કર્યા બાદ ચાલુ મહિને જ પરીક્ષા લેવાશે કે કેમ? તેને લઈને વિદ્યાર્થીઓ મુંઝવણમાં મુકાઈ ગયા હતા. આ મુદ્દે યુનિવર્સિટીએ પરીક્ષા વિભાગનો સંપર્ક કરતા અધિકારીઓના કહેવા પ્રમાણે હાલમાં ઓનલાઈન પરીક્ષા આપવી હોય તેવા વિદ્યાર્થીઓને સૂચના આપવામાં આવી છે. રિપોર્ટ મુજબ હાલ સ્થગિત કરાયેલી ઓફલાઈન પરીક્ષા ઓગસ્ટમાં લેવામાં આવે તેવી કોઈ સૂચના નથી. જોકે, પરીક્ષાઓ ક્યારે લેવાશે તે અંગે આગામી દિવસોમાં નિર્ણય લેવાઈ શકે છે. બીજી તરફ શિક્ષણ વિભાગે સપ્ટેમ્બર સુધીમાં ઓફલાઈન પરીક્ષા યોજવાની તાકીદ કરી હોવાથી પરીક્ષાઓ આવતા મહિને જ લેવાય તેવી સંભાવના છે. જણાવી દઈએ કે, એક મહિના પહેલા ગુજરાત યુનિવર્સિટીની પરીક્ષાની તારીખો જાહેર થઈ હતી. જે મુજબ, બે તબક્કામાં ઓફલાઈન પરીક્ષા લેવાશે તેવી જાહેરાત કરાઈ હતી. જેમાં ૨૧ ઓગસ્ટ અને ૩૧ ઓગસ્ટના રોજ પરીક્ષા લેવાશે તેવું કહેવાયું હતું. આ ઓફલાઈન પરીક્ષામાં સ્નાતક અને અનુસ્નાતકના આખરી વર્ષમાં અભ્યાસ કરતા વિદ્યાર્થીઓ પરીક્ષા લેવાનાર હતી.