Gujarati News

Gujarati News

News of Thursday, 18th November 2021

આબુનો યુવક હેલિકોપ્ટરમાં જાન લઈ ડીસા પરણવા આવ્યો

વરરાજાએ વધૂની ઈચ્છા પૂરી કરી : લગ્નમાં ૨૦ લાખનો ખર્ચ કરીને હેલિકોપ્ટર ભાડે કરીને ડીસાની હોટલના ગ્રાઉન્ડમાં હેલિકોપ્ટરનું લેન્ડિંગ કરાયું

ડીસા , તા.૧૭ : રાજસ્થાનના આબુરોડમાં રહેતો યુવક હેલિકોપ્ટરમાં જાન લઈને ડીસા પરણવા આવ્યો હતો. ડીસા ખાતે હેલિકોપ્ટરમાં જાન આવી હોવાના સમાચાર વાયુવેગે પ્રસરતા જોવા માટે લોકોના ટોળેટોળા ઉમટી પડ્યા હતા. પ્રાપ્ત માહિતી અનુસાર રાજસ્થાનના આબુરોડ ખાતે રહેતા માલી સમાજના પરિવારે શાહી લગ્ન કર્યા છે. મીડિયા રિપોર્ટ મુજબ રાજસ્થાનના માળી પરિવારનો સુરેન્દ્ર રાઠોડ પોતાની જાન હેલિકોપ્ટરમાં લઈને બનાસકાંઠાના જિલ્લાના ડીસા ખાતે આવ્યા હતા. હેલિકોપ્ટરમાં જાન આવતા આસપાસના લોકોના ટોળેટોળા ઉમટી પડ્યા હતા.

અહેવાલો અનુસાર ડીસાની યુવતી હની પઢિયારની જીદ હતી કે તેનો થનાર પતિ લગ્ન કરવા માટે હેલિકોપ્ટરમાં જાન લઈને આવે. જેથી સુરેન્દ્ર રાઠોડ તેમની ફિયાન્સી હિનાની જીદ પૂરી કરવા માટે રાજસ્થાનની લગ્નમાં ૨૦ લાખનો ખર્ચ કરીને હેલિકોપ્ટર ભાડે કરીને ડીસાની હોટલના ગ્રાઉન્ડમાં હેલિકોપ્ટનું લેન્ડિંગ કરાયું હતું.

ઉલ્લેખનીય છે કે, જૂનમાં સૌરાષ્ટ્રના નાના એવા ગામમાં પણ એક યુવક હેલિકોપ્ટરમાં જાન લઈને પરણવા આવ્યો હતો. મીડિયા રિપોર્ટ મુજબ દેવભૂમિ દ્વારકાના ભાણવડ તાલુકાના સણખલા ગામમાં હેલિકોપ્ટરમાં લગ્નની જાન આવી પહોંચતા મોટી સંખ્યામાં ગ્રામજનો જોવા માટે ઉમટી પડ્યા હતા. એટલું નહીં, જાન આવતાની સાથે વરરાજા પર પૈસાનો વરસાદ કરવામા આવ્યો હતો અને તેને લેવા માટે લક્ઝુરિયસ કારનો કાફલો પણ હતો.

(9:06 pm IST)