Gujarati News

મહેમદાવાદ: તાલુકાના સણસોલી ગામના પાટીયા નજીક માર્ગ પરથી પુરપાટ ઝડપે પસાર થઈ રહેલ કોઈ અજાણ્યાં વાહનના ચાલકે એક્ટિવાને ટક્કર મારી હતી. આ અકસ્માતમાં ગંભીર ઈજાગ્રસ્ત બનેલા એક્ટિવા ચાલકનું સારવાર દરમિયાન મોત નિપજ્યું હતું. આ બનાવ અંગે મહેમદાવાદ પોલીસે અજાણ્યાં વાહનચાલક સામે ગુનો નોંધી કાયદેસરની કાર્યવાહી હાથ ધરી છે.

આ અંગે મળતી માહિતી મુજબ અમદાવાદમાં આવેલ સાબરમતી ભુત બંગલા વિસ્તારમાં રહેતાં ૪૪ વર્ષીય નિતીનભાઈ શ્યામસુંદરભાઈ બારીયા ગતરોજ કોઈ કામ અર્થે આણંદ ગયાં હતાં. જ્યાં કામકાજ પતાવ્યાં બાદ રાત્રીના નવ વાગ્યાના અરસામાં તેઓ પોતાનું એક્ટિવા ન.ં જીજે- ૦૧, એફઝેડ-૫૩૧૪ લઈ ઘરે પરત જઈ રહ્યાં હતાં. ત્યારે મહેમદાવાદ તાલુકાના સણસોલી ગામના પાટીયા નજીક માર્ગ zપરથી પુરપાટ ઝડપે પસાર થતાં કોઈ અજાણ્યાં વાહનના ચાલકે નિતીનભાઈના એક્ટિવાને ટક્કર મારી હતી. આ અકસ્માતમાં એક્ટિવા પરથી ફંગોળાઈ રોડ પર પટકાયેલા નિતીનભાઈને માથાના ભાગે તેમજ શરીરના અન્ય ભાગે ગંભીર ઈજા પહોંચી હોઈ સારવાર માટે મહેમદાવાદ સરકારી દવાખાનામાં ખસેડવામાં આવ્યાં હતાં. જ્યાં સારવાર દરમિયાન નિતીનભાઈ શ્યામસુંદરભાઈ બારીયાનું મોત નિપજ્યું હતું.