Gujarati News

Gujarati News

News of Saturday, 28th May 2022

છોકરીઓ સાથે ગોવા ગયાનો આરોપ લગાવી યુવકને પત્ની-સાસુએ માર્યો

યુવક માટે ગોવા પ્રવાસની મજા બની સજા : ગોવા કેટલીક છોકરીઓ સાથે ગયો હોવાનો અને તેમની સાથે શારીરિક સંબંધો બાંધ્યાનો આરોપ લગાવી હુમલો કર્યો

અમદાવાદ, તા.૨૮ : દરેક વ્યક્તિ જીવનમાં એકવાર ગોવા જવાની ઈચ્છા ધરાવે છે, ત્યાં રજાઓ ગાળવાની મજા જ કંઈક અલગ છે. ગોવા ફરવા ગયા બાદ કોઈ પણ ત્યાંથી પરત આવવા માગતું નથી. ત્રાગડનો એક યુવક જે ગોવા ફરવા માટે ગયો હતો, તે પણ આવી જ ઈચ્છા ધરાવતો હતો પરંતુ તેનું કારણ અલગ હતું. ૩૫ વર્ષીય વ્યક્તિ ટ્રિપ પરથી માત્ર તેની નારાજ પત્ની અને સાસુના ક્રોધનો સામનો કરવા પરત ફર્યો હતો. જેમણે સૌથી પહેલા કથિત રીતે તે કેટલીક છોકરીઓ સાથે ગોવા ગયો હોવાનો આરોપ લગાવ્યો હતો અને બાદમાં ક્રિકેટ બેટથી હુમલો કર્યો હતો. સાબરમતી પોલીસ સ્ટેશનમાં ફરિયાદ નોંધાવતા, અદાણી પ્રથમના રહેવાસી તુષાર પટેલે કહ્યું હતું કે ૧૨ વર્ષ પહેલા તેણે આશા પટેલ સાથે લગ્ન કર્યા હતા. તુષાર પટેલ, જે જમીન દલાલીનું કામ કરે છે તેણે કહ્યું હતું કે, 'તે હંમેશા શંકા કરતી હતી. મારું અન્ય મહિલાઓ સાથે ચક્કર ચાલી રહ્યું હોવાનો દાવો કરીને તે અવારનવાર મારી સાથે ઝઘડો કરતી હતી'.

તુષાર પટેલે કહ્યું હતું કે, પત્નીને ટ્રિપની જાણ કર્યા બાદ તે તેના મિત્રો સાથે ૨૨ મેના રોજ ગોવાની ચાર દિવસની ટ્રિપ પર ગયો હતો. મારી પત્ની અને તેના મમ્મી હંસા પટેલ મારા ઘરે હોવાનું જાણ્યા બાદ ગુરુવારે રાતે ૯.૩૦ કલાકે ગોવાથી પરત આવ્યો હતો. મારી પત્નીએ હું ગોવા કેટલીક છોકરીઓ સાથે ગયો હોવાનો અને તેમની સાથે શારીરિક સંબંધો બાંધ્યાનો આરોપ લગાવ્યો હતો. મેં જવાબમાં તેને હું મારા મિત્રો સાથે ગયો હોવાનું અને ત્યાં કોઈ છોકરીને ન મળ્યો હોવાનું કહ્યું હતું', તેમ તેણે પોલીસને જણાવ્યું હતું.

તેણે ઉમેર્યું હતું કે, મેં જે કહ્યું તે વાત સાથે આશા અસંમત થઈ હતી અને મને મારવાનું શરૃ કરી દીધું હતું. આટલું જ નહીં મનફાવે તેમ ગાળો પણ આપી હતી. તે ક્રિકેટ બેટ લઈ આવી હતી અને દયા રાખ્યા વગર મને તેનાથી મારવા લાગી હતી. તેના મમ્મીએ પણ અપશબ્દો કહ્યા હતા અને મને માર માર્યો હતો.

 ટ્રિપ પરથી થાકીને આવ્યો હતો અને ઘરે આવીને માર માર્યો. ઘરે મને ઉંઘ આવી નહોતી'.

શુક્રવારે સવારે, તુષાર પટેલ સોલા સિવિલ પોલીસ સ્ટેશને ગયો હતો, જ્યાં તેણે મેડિકો-લીગલ કેસ નોંધાવ્યો હતો. બાદમાં તેણે સાબરમતી પોલીસ સમક્ષ પત્ની અને સાસુ સામે ઈજા પહોંચાડવાનો ગુનો નોંધાવ્યો હતો.

(7:38 pm IST)