Gujarati News

 અમદાવાદ, તા.૨૮ : શહેરના થલતેજ વિસ્તારમાંથી ૬ વર્ષના બાળકનું અપહરણ કર્યા પછી પકડાઈ જવાના ડરે બાળકને ગંભીર ઈજા પહોંચાડીને જાહેરમાં તરછોડીને ફરાર થઈ જનાર ૩૯ વર્ષનો રાહુલ પટેલ કે જે બાળકના ઘરની નજીક જ રહે છે. પોલીસે આ કેસમાં તેની ધરપકડ કર્યા બાદ અનેક ચોંકવનારા ખુલાસા સામે આવી રહ્યા છે, જે મુજબ રાહુલે પડોશીના છોકરાનું અપહરણ એટલા માટે કર્યું હતું કે પોતાના ઘરે જન્મેલા ત્રણ બાળકોનો મેડિકલ ખર્ચ ઉઠાવી શકે અને તેના માથે ચડેલી રુ. ૨૫ લાખની લોનની ચૂકવણી કરી શકે. આ માટે તેણે પોતાની જ સોસાયટીમાંથી બાળકનું અપહરણ કરીને ખંડણી માગવાનો પ્લાન કર્યો હતો.

પોલીસ અધિકારીએ જણાવ્યું કે પટેલ અને તેની પત્ની ૧૨ વર્ષથી નિઃસંતાન હતા અને તેમણે છેલ્લે સંતાન માટે આઈવીએફ પ્રક્રિયા પસંદ કરવાનું નક્કી કર્યું. *પટેલની પત્નીએ ગયા વર્ષે આઈવીએફ દ્વારા એક સાથે ત્રણ બાળકોને જન્મ આપ્યો હતો, જેનો ખર્ચ દંપતીને રૃ. ૧૦ લાખ થયો હતો. કારણ કે ત્રણેય બાળકોને કેટલીક આરોગ્ય સમસ્યાઓ હતી, જેથી તેમના તબીબી ખર્ચમાં વધારો થયો હતો,* એક પોલીસ અધિકારીએ જણાવ્યું હતું. દરમિયાન, કોલસા, લાકડા અને સિરામિકનો વ્યવસાય ચલાવતા પટેલને કોવિડ-૧૯ પ્રેરિત મંદી દરમિયાન ભારે નાણાકીય નુકસાન સહન કરવું પડ્યું હતું. આખરે, તેણે વિવિધ લોન પ્રદાતાઓ પાસેથી આશરે રૃ. ૨૫ લાખની લોન લીધી. જો કે, નૈતિક માધ્યમ દ્વારા તેનું દેવું ચૂકવવાને બદલે, તેણે થલતેજમાં પાર્ક વ્યૂ ફ્લેટ પોતે પણ જ્યાં રહેતો હતો ત્યાં નજીકના બ્લોકમાં રહેતા છ વર્ષના જિયાંશ કાપડિયાનું અપહરણ કરવાનું નક્કી કર્યું.

બુધવારે સાંજે ગેમ રમવાના બહાને રાહુલ પટેલ જીયાંશ અને અન્ય બાળકોને પાર્કિંગમાં લઈ

ગયો જ્યાં તેણે પહેલેથી જ પોતાની કાર પાર્ક કરી હતી. તેણે બાળકોને સીડીઓ ગણવા કહ્યું, તે સારી રીતે જાણતો હતો કે જિયાંશ નાનો હોવાથી તે આમ કરવામાં વધુ સમય લેશે. જ્યારે અન્ય બાળકોએ સીડીઓ ગણવાનું પૂરું કર્યું, ત્યારે તેણે તેમને બગીચામાં દોડવા માટે કહ્યું. જે પછી તકની રાહ જોતા રાહુલ પટેલે જીયાંશને ઊંચક્યો ડેકીમાં નાખીને કાર લઈને નીકળી ગયો. જ્યારે તે શીલજ પહોંચ્યો, ત્યારે તેને હાઉસિંગ સોસાયટીના અન્ય રહેવાસીનો ફોન આવ્યો કે સોસાયટીમાંથી જિયાંશ ગુમ થઈ ગયો છે અને તે પરત આવીને જિયાંશને શોધવામાં મદદ કરે.* તેમ એક પોલીસ અધિકારીએ કહ્યું.

જોકે પકડાઈ જવાના ડરથી તેણે જીયાંશને પોતાની કારમાંથી બહાર કાઢ્યો અને તેના માથા પર ઈંટો વડે મારવાનું શરૃ કર્યું જ્યાં સુધી છોકરો બેભાન ન થઈ ગયો. ત્યારબાદ તેણે જિયાંશને શિલાજ પુલ પાસે ફેંકી દીધો હતો. એમ પોલીસે જણાવ્યું હતું. જે બાદ રાહુલ પટેલ પોતાના પરની શંકાને ટાળવા માટે જીયાંશની શોધમાં અન્ય લોકો સાથે જોડાયો હતા. ત્યારે સીસીટીવી ફૂટેજ પરથી જાણવા મળ્યું હતું કે અપહરણ થયું તે સમયે રાહુલ જ કાર દ્વારા સોસાયટીમાંથી નીકળ્યો હતો. જે બાદ પોલીસે આગવી ઢબે પૂછપરછ કરતા રાહુલ પટેલે પોતાના ગુનાની કબૂલાત કરી અને પોલીસને કહ્યું કે પોતાના દેવાની ચુકવણી કરવા અને પોતાના ત્રણ બાળકોના પેટ ભરવા માટે તેણે જીયાંશનું અપહરણ કરી તેના પિતા પાસેથી ખંડણી માંગવા માટે આ પ્લાન બનાવ્યો હતો. સોલા પોલીસે તેની સામે અપહરણ અને હત્યાના પ્રયાસનો ગુનો નોંધી વધુ તપાસ હાથ ધરી છે.