હવસખોરે ૭ વર્ષની બાળકીની રેપ બાદ હત્યા કરીઃ લાશ પેટી પલંગમાં સંતાડી દીધી
સુરતના કતારગામ વિસ્તારમાંથી એક બાળકી સાથે દુષ્કર્મ અને બાદમાં હત્યા કરી દેવામાં આવી હોવાની ઘટના સામે આવી છે : લોકોને ગેરમાર્ગે દોરવા માટે આરોપી પરિવાર સાથે તેને શોધવા પણ નીકળ્યો હતો
સુરત, તા.૯ : શહેરમાં બળાત્કાર અને હત્યાના ગુનામાં દિવસે ને દિવસે વધારો થઈ રહ્યો છે. ત્યારે કતારગામના વાળીનાથ ચોક પાસે આવેલી એક સોસાયટીમાં રહેતી સાત વર્ષીય માસૂમ બાળકીનો રેપ કર્યા બાદ હત્યા કરી દેવામાં આવી હોવાની ઘટના સામે આવી છે. સવારથી આ બાળકી ગુમ હતી અને જ્યારે એક બંધ મકાનું તાળુ તોડીને અંદર પ્રવેશ કરવામાં આવ્યો તો ત્યારે આ માસૂમ બાળકીની લાશ ઘરમાં રહેલા પેટી પલંગના કોથળામાંથી મળી આવી હતી. આ ઘટના બાદ લોકોનાં ટોળે ટોળા ઉમટયા હતા. સાથે જ આ હિચકારી ઘટના બાદ સમગ્ર વિસ્તારમાં હાહાકાર મચી જવા પામ્યો છે. બીજી તરફ, હવસખોર શખસ ઘટના સ્થળે નાસી છૂટયો હતો. ત્યારે સિંગણપોણ વિસ્તારમાંથી ક્રાઈમ બ્રાંચની ટીમે આરોપી મુકેશ પ્રજાપતિને રાત્રે ઝડપી પાડ્યો હતો. પોલીસે આ મામલે ગુનો નોંધીને આગળની કાર્યવાહી હાથ ધરી છે.
રહસ્યમય રીતે બાળકી ગાયબ થઈઃ પોલીસ સૂત્રોના જણાવ્યા મુજબ, કતારગામના વાળીનાથ ચોક પાસે આવેલી એક સોસાયટીમાં રહેતી સાત વર્ષની બાળકી સવારથી ગુમ હતી. પરિવારે બાળકીની શોધખોળ કરી હતી. જો કે, મોડા સુધી શોધખોળ કર્યા બાદ બાળકી ન મળતા પરિવારના લોકો પોલીસ સ્ટેશન પહોંચ્યા હતા. પોલીસે જ્યારે તપાસ કરી તો જાણવા મળ્યું કે, બાળકી બહાર એપાર્ટમેન્ટમાંથી બહાર જ નહોતી નીકળી. બાળકી અચાનક રહસ્યમય રીતે ગાયબ થઈ ગઈ હોય આખો મામલો પણ ગંભીર બન્યો હતો.
પોલીસે એપાર્ટમેન્ટના ફ્લેટ પણ તપાસ્યા હતા. ત્યારે બાળકી જે ફ્લોર પર રહેતી હતી ત્યાં મુકેશ પ્રજાપતિ નામના શખસના ઘરે તાળુ મારેલું હતું. ત્રીસ વર્ષનો મુકેશ પ્રજાપતિ ત્યાંથી ફરાર હતો અને પોલીસને શંકા ગઈ. એટલે પોલીસે લોકોની હાજરીમાં દરવાજાનું તાળુ તોડી નાખ્યું હતું. પછી પોલીસે ઘરની તલાશી લીધી હતી. ત્યારે ઘરમાં રાખવામાં આવેલા એક પેટી પલંગમાંથી કોથળામાં છૂપાવેલી હાલતમાં બાળકીની લાશ મળી આવી હતી.
પોલીસ તપાસમાં સામે આવ્યું કે, બાળકીનો બળાત્કાર કર્યા બાદ તેની હત્યા કરી દેવામાં આવી હતી. આ ઘટનાના પગલે લોકોનાં ટોળે ટોળા ઉમટયા હતા. આ ઘટના વાયુવેગે સમગ્ર વિસ્તારમાં ફેલાતા ચકચાર મચી ગઈ હતી. પોલીસ તપાસમાં એવું પણ સામે આવ્યું કે, પહેલાં બાળકીનો બળાત્કાર કરવામાં આવ્યો હતો અને પછી તેની હત્યા કરી દેવામાં આવી હતી. આરોપી મુકેશના માતા-પિતા બહારગામ ગયા હતા. આ સમયે આરોપીને વાસનાનું ભૂત વળગ્યું હતું અને તેણે આ કાંડને અંજામ આપ્યો હતો. એટલું જ નહીં જ્યારે બાળકીની શોધખોળ હાથ ધરવામાં આવી ત્યારે તે પણ તેમાં જોડાયો હતો. બાદમાં જ્યારે પોલીસની દખલ થઈ ત્યારે તે ઘરે તાળુ મારીને જતો રહ્યો હતો.
બાદમાં પોલીસે તેનો મોબાઈલ ફોન ટ્રેસ કર્યો તો તેનું લોકેશન સિંગણપોર વિસ્તારમાં મળ્યું હતું. પોલીસે જ્યારે ફોન કર્યો તો તે પણ સ્વીચ ઓફ આવતો હતો. બાદમાં પરફેક્ટ લોકેશન મેળવીને પોલીસે આરોપી મુકેશને ઝડપી પાડ્યો હતો. આ મામલે પોલીસે આગળની તપાસ હાથ ધરી છે.