પતિએ પત્નીની હત્યા કરી માથું નાળામાં ફેકી દીધું

ચારિત્ર્યની શંકામાં ખુની ખેલ ખેલાયો : નાળામાંથી માથું મળી આવતા સ્થાનિકો ડુંગરા પોલીસને જાણ કરતા કાફલો ઘટનાસ્થળે પહોંચી ગયો હતો

વાપી,તા.૧૭  : વલસાડ જિલ્લાના વાપી તાલુકાના ડુંગર પોલીસ સ્ટેશન વિસ્તારમાં એક હૃદય કંપાવનારી ઘટના સામે આવી છે. પ્રાપ્ત માહિતી અનુસાર, ચારિત્ર્યની શંકામાં હેવાન પતિએ પત્નીની નિર્મમ હત્યા કરીને તેનું માથું નાળામાં ફેંકી દીધું હતું. નાળામાંથી માથું મળી આવતા સ્થાનિકો ડુંગરા પોલીસને જાણ કરતા કાફલો ઘટનાસ્થળે પહોંચ્યો હતો અને હત્યાનો ગુનો નોંધ્યો હતો. પોલીસ તપાસ દરમિયાન પતિએ જ પત્નીની હત્યા કરીને હોવાનું સામે આવતા કાયેદસરની કાર્યવાહી હાથ ધરવામાં આવી છે. પ્રાપ્ત અહેવાલો અનુસાર ડુંગરા પોલીસને કોઈએ ફોન કરીને જાણ કરી હતી કે ડુંગરા ફળિયા મેઈન રોડ પહેલા મચ્છી માર્કેટ પાસેના નાળામાં અજાણી મહિલાનું માથું પડ્યું છે.

         આ સાંભળતા જ પીઆઈ સહિતનો કાફલો ત્યાં દોડી આવ્યો હતો અને નાળામાંથી મહિલાનું માથું કબજે કરીને તેની ઓળખ સહિતના પ્રયાસો હાથ ધરવામાં આવતા તેની ઓળખ સાધનાદેવી તરીકે થઈ હોવાનું જાણવા મળ્યું હતું. આ દરમિયાન પોલીસ તપાસ દરમિયાન મહિલા પતિ લક્ષ્મીકાંત ઉર્ફે ભોલા મુચકુ દલાલ વિશ્વકર્મા સાથે ડુંગરા ફલિયાના સામે રહેતા હોવાનું અને મૂળ ઉત્તર પ્રદેશના હોવાની જાણ થતાં પોલીસ તેમના રૂમે પહોંચી હતી. જ્યાં મહિલાના માથા વગરનું ધડ ત્યાંથી મળી આવ્યું હતું. જો કે, તેનો પતિ ગાયબ હોવાથી પોલીસે રૂમ માલિકની ફરિયાદના આધારે પતિની શોધખોળ હાથ ધરી હતી. જેમાં પોલીસે અલગ-અલગ ટીમો બનાવી તેમજ ટેક્નિકલ સર્વેલન્સના આધારે આરોપી પતિ લક્ષ્મીકાંતને ઝડપી લેવામાં આવ્યો હતો. આરોપી પતિ લક્ષ્મીકાંતને કસ્ટડીમાં લીધા બાદ ડુંગરા પોલીસે પૂછપરછ હાથ ધરી હતી. જેમાં તેણે પત્નીના ચારિત્ર્ય પર વહેમ હોવાથી તેની સાથે ઝઘડો થયો હતો. જેમાં ઉશ્કેરાઈને તેને છરા વડા પત્નીનું ગળું કાપી ધડથી અલગ કરીને ઓળખ છૂપાવવા માથું નાળામાં ફેંકી દીધું હોવાની કબૂલાત કરી હતી. સમગ્ર ઘટના ગુરુવારે રાતે બની હોવાની જાણવા મળ્યું છે. હાલ પોલીસે પતિ સામે હત્યાનો ગુનો દાખલ કરીને કાયદેસરની કાર્યવાહી હાથ ધરી છે.