અમદાવાદની હોટલ વિનસમાં પોલીસ પર ફાયરીંગ પ્રશ્ને ઝડપાયેલા ઇરફાન પોલીસ પાસે પોપટ બની ગયો ડોન રાજન પર ફાયરીંગ કરનાર મુન્નાએ ઝડફીયાની હત્‍યાની યોજના પાકિસ્‍તાનમાં બનાવી હતી

ઇરફાનને હથીયાર આપનાર પાંચ શખ્‍સોની પુછપરછ હાથ ધરતી એ.ટી.એસ. ટીમ

અમદાવાદ: ભાજપ અગ્રણી ગોરધન ઝડફીયા ની હત્યાનું કાવતરૂ અંડરવર્લ્ડ ડોન છોટા રાજન પર બેંગકોકમાં ફાયરિંગ કરનાર મુન્ના ઝીંગાડા એ પાકિસ્તાનમાં બેસીને ઘડયાનો ઘટસ્ફોટ થયો છે. ગોરધન ઝડફીયા ની હત્યા કરવા આવેલા અને એટીએસ અને ક્રાઇમબ્રાન્ચ પર ફાયરિંગ કરનાર ઇરફાને (Irfan) ખુલાસો કર્યો છે. ઇરફાન ને હથિયાર આપનાર 5 શખ્સોની પણ એટીએસની ટીમે અટક કરી પૂછપરછ શરૂ કરી છે.

ભાજપના આગેવાન ગોરધન ઝડફીયાની હત્યાની યોજના પાકિસ્તાનમાં ઘડાયાની વિગતો ખુલી છે.

આ કાવતરામાં અંડરવર્લ્ડ ડોન રાજન પર ફાયરિંગ કરનાર મુન્ના ઝીંગાડા સામેલ છે.

મુન્નાએ ઇરફાનનો ઝડફીયા (Gordhan Zadafia)ને મારવા માટે મોકલ્યો હોવાનું ખુલ્યું છે.

મુન્ના બેંગકોકની જેલમાં 16 વર્ષ રહ્યા બાદ પાકિસ્તાન જતો રહ્યો હતો.

એટીએસની શંકા છે કે મુન્ના હાલમાં છોટા શકીલ (Chhota Shakil) માટે કામ કરી રહ્યો છે. હાલમાં એ દિશામાં પોલીસ તપાસ ચાલી રહી છે.

એટીએસની ટીમે મહારાષ્ટ, કર્ણાટક સહિતના વિસ્તારોમાંથી 5 જેટલા શખ્સોની અટક કરી પૂછપરછ કરી છે.

આ તમામની ઝડફીયાની હત્યા કરવાના કાવતરામાં સંડોવણી અંગે તપાસ ચાલે છે.

ગોરધન ઝડફીયાની હત્યા કરવા માટે આવેલા ઇરફાન પાસેથી મળી આવેલા હથિયારો આપવામાં આ પાંચ શખ્સોની સંડોવણી ખુલી છે.

મુન્નાના મોબાઈલ નંબરના આધારે પણ કેટલીક વિગતો એટીએસની ટીમને મળી છે.

બનાવની વિગત મુજબ ગત 18મી તારીખે એટીએસની ટીમે ગોરધન ઝડફીયાને મારવા આવેલા છોટા શકીલના શૂટર રિલીફ રોડની હોટલ વિનસમાં રોકાયા હોવાની બાતમીને પગલે રેડ કરી હતી.

એટીએસના ડીઆઈજી હિમાંશુ શુક્લા, ક્રાઈમ બ્રાન્ચના ડીસીપી દીપન ભદ્રન, એટીએસના ડીવાયએસપી કે.કે.પટેલ અને ભાવેશ રોઝિયા હોટલ પર પહોંચ્યા હતા.

દરમિયાન ઈરફાન જે રૂમમાં રોકાયો તે રૂમમાં અધિકારીઓએ ખખડાવી ખોલાવ્યો હતો.

રૂમ ખોલતા પોલીસને જોઈ હેબતાઈ ગયેલા ઇરફાને ફાયરિંગ કર્યું પણ કોઈ ને ઇજા પહોંચી ન હતી. પોલીસ અધિકારીઓએ આરોપીને ઝડપી લીધો હતો.