માતા સ્વીટી પટેલની હત્યા અને પિતા પી.આઇ. અજય દેસાઇ જેલ હવાલે થતા 2 વર્ષનો નોંધારો થયેલ પુત્રને પીઆઇની બીજી પત્નીએ સંભાળવાની જવાબદારી લઇને માનવતા મહેકાવીઃ હત્યા માટે વપરાયેલ કાર જય પટેલની હોવાનું ખુલ્યુ
બીજા લગ્ન સામાજીક રીતિરિવાજો સાથે થતા પત્ની તરીકે કાયદેસરની માન્યતા પ્રાપ્ત કરવા સ્વીટીએ ધમપછાડા કર્યા હતા
વડોદરા: કરજણના પીઆઈ અજય દેસાઈએ ગુસ્સામાં પત્નીનું ખૂન તો કર્યું, પણ બે વર્ષના માસુમ દીકરાના મોઢા સામે એકપણ વાર ન જોયું. પોતાનો સ્વાર્થ સાધવામાં આ દીકરાના ભવિષ્ય સાથે તેમણે રમત રમી. પત્ની સ્વીટી પટેલને માર્યા બાદ હાલ અજય દેસાઈ જેલના સળિયા પાછળ ધકેલાયો છે. આ સાથે જ બે વર્ષનો માસુમ દીકરો નોંધાયો બન્યો છે. આ દીકરાને કોણ રાખશે તે મામલે અનેક સવાલો થયા હતા. પરંતુ અજય દેસાઈની સામાજિક પત્નીએ તેને સંભાળવાની જવાબદારી લીધી છે.
અજય દેસાઈની સામાજિક પત્નીએ માતૃત્વ ધર્મ નિભાવ્યો
સ્વીટી પટેલના બે વર્ષના પુત્રને અજય દેસાઈની પત્ની પોતાની સાથે રાખશે. અજય દેસાઈની સામાજિક પત્નીએ માતૃત્વનો ધર્મ નિભાવ્યો છે. પોતાને બે વર્ષનો પુત્ર હોવા છતાં તેઓ સ્વીટી પટેલના પુત્ર અંશને સાથે રાખી બેવડું માતૃત્વ નિભાવશે. ત્યારે અનેક લોકોએ તેમના આ નિર્ણયને આવકાર્યો છે.
અજય દેસાઈના બીજા લગ્નથી અજાણ હતી સ્વીટી
અજય દેસાઈના બીજા લગ્ન સામાજિક રીતરિવાજો સાથે થયા હતા. વાતની જાણ થતા જ અજય દેસાઈ અને સ્વીટી પટેલ વચ્ચે તકરારો શરૂ થઈ હતી. સ્વીટીએ પત્ની તરીકેની કાયદેસરની માન્યતા પ્રાપ્ત કરવા ધમપછાડા કર્યા હતા. આ જ કારણ હતુ કે અજય દેસાઈએ સ્વીટીનું ખૂન કર્યું હતું.
સ્વીટીની હત્યા માટે વપરાયેલી કાર જય પટેલની નીકળી
સ્વીટી પટેલ હત્યા કેસમાં પીઆઈ અજય દેસાઈ દ્વારા જે જીપ કંપાસ કારનો ઉપયોગ કરવામાં આવ્યો હતો. તે કાર પણ પોલીસે કબજે કરી છે. કારના માલિક જય પટેલ હોવાનું બહાર આવ્યું છે. જય પટેલ કિરીટસિંહ જાડેજા સાથે અંગત સંબંધ ધરાવતો હોવાનું જાણવા મળ્યું છે. ત્યારે જય પટેલ અંગે પણ ક્રાઈમ બ્રાંચ તપાસ કરી રહી છે.