Gujarati News

બગદાદ,તા. ૩: ઈરાકમાં એક રસોઈઓ સૂપના મોટા તપેલામાં પડી ગયો હતો અને તેના કારણે તેના શરીરનો મોટો ભાગ દાઝી ગયો હતો. જેના કારણે તેનું મોત થયું હતું. રસોઈઓ ઈસા ઈસ્માઈલ ૧૫ જૂને ઝાખોમાં હેઝલ વેડિંગ હોલ ખાતે લગ્ન સમારંભ માટે તૈયારી કરી રહ્યો હતો.

ઈસ્માઈલ એક મોટા તપેલામાં રહેલા સૂપને હલાવી રહ્યો હતો ત્યારે તે લપસી ગયો હતો અને તપેલામાં પડી ગયો હતો. ઉકળતા સૂપમાં પડી જવાના કારણે તેનું શરીર દાઝી ગયું હતું અને તેને ત્યાંથી ૪૦ માઈલ્સ દૂર આવેલી દોહુક હોસ્પિલ લઈ જવામાં આવ્યો હતો. ડોકટરોએ તેને સાજો કરવા માટે ઘણા દિવસો સુધી તેની સારવાર કરી હતી પરંતુ ૨૧ જૂને તેનું મોત થયું હતું. તેના શરીરનો ૭૦ ટકા ભાગ દાઝી ગયો હતો.

ત્રણ બાળકોના પિતા એવા ૨૫ વર્ષીય રસોઈયાના મોતથી ઈરાકના મીડિયામાં શોકની લાગણી વ્યાપી ગઈ છે અને સોશિયલ મીડિયા પર પણ તેને મોટી સંખ્યામાં લોકો શ્રદ્ઘાંજલિ પાઠવી રહ્યા છે. જોકે, આ સાથે સોશિયલ મીડિયા યુઝર્સ સુરક્ષાની વ્યવસ્થાનો અભાવ હોવાની વાતને આ માટે જવાબદાર ગણાવી રહ્યા છે.

આ તપેલુ એટલું મોટું હતું કે તેમાં એક વ્યકિત આરામથી સમાઈ શકે તેમ હતો. આ તપેલુ રસોડામાં ફ્લોર પર મૂકવામાં આવ્યું હતું ત્યારે આ દ્યટના બની હતી. મૃતક રસોઈયાના સંબંધી ઝેરવાન હોસ્નીએ જણાવ્યું હતું કે ઈસ્માઈલ છેલ્લા આઠ વર્ષથી રસોઈઆ તરીકે કામ કરી રહ્યો હતો.

હોસ્નીએ જણાવ્યું હતું કે, ઈસ્માઈલ લગ્ન સમારંભ, મૃત્યુના પ્રસંગે થતા જમણવાર તથા અન્ય ઉજવણીઓના પ્રસંગ માટે જમવાનું બનાવતો હતો. છેલ્લા બે વર્ષથી તે ૨૫,૦૦૦ દિનાર પ્રતિ દિવસના વેતનથી બે પાર્ટી હોલ સાથે કામ કરતો હતો. તેને બે પુત્રીઓ અને છ મહિનાનો એક પુત્ર છે.