Gujarati News

મોસ્કો, તા. ૫ : રશિયામાં દારુ પીવામાં દંપતી એટલા તો બેદરકાર બની ગયા હતા કે તેમને પોતાની આસપાસ શું થઈ રહ્યું છે તેની પણ ખર નહોતી. આ દંપતી એટલું નશો કરેલું હતું કે તેઓ તેમના ૨૧ મહિનાના બાળકની સંભાળ રાખી શક્યા ન હતા. તેણે બાળકના પલંગની બાજુની બારી ખુલ્લી છોડી દીધી હતી. આ દરમિયાન આ બાળક પથારી પર રમતી વખતે ૧૪ મા માળેથી નીચે પટકાયો હતો. મોટી વાત એ છે કે માતા-પિતાએ બાળક પડી ગયો છે તેની ખબર ત્યારે પડી જ્યારે પોલીસે ડોરબેલ વગાડીને મૃતદેહને તેમના હવાલે કર્યો.

ડેઇલી મેઇલના અહેવાલ મુજબ, રશિયાની રાજધાની મોસ્કોના એલેક્ઝાંડર અને તૈસીઆ અકીમોવને પુત્ર ટિમોફેઈને બેદરકારીથી મોતને ઘાટ ઉતારવાનાં આરોપ હેઠળ ધરપકડ કરવામાં આવી છે. જો દોષી ઠેરવવામાં આવશે તો, દંપતીને ઓછામાં ઓછા બે વર્ષ જેલની સજા થઈ શકે છે. રશિયન લો એન્ફોર્સમેન્ટ એજન્સીઓ માને છે કે બાળક ૧૪ મા માળની ટાવર બ્લોક વિંડોમાંથી નીચે પડી ગયું હતું.

રશિયન મીડિયા રિપોર્ટ્સ અનુસાર, નિર્દોષ ટિમોફેઈની લાશ માર્શલ ઝાખારોવ સ્ટ્રીટ પર રહેણાંક ટાવર બ્લોક નીચે રસ્તા પરથી પસાર થતા લોકોને મળી હતી. જે બાદ તેમણે માહિતી આપીને પોલીસને બોલાવી હતી. રશિયન તપાસ સમિતિના પ્રવક્તા યુલિયા ઇવાનોવાએ જણાવ્યું હતું કે, તે સાબિત થઈ ગયું છે કે અકસ્માત સમયે બાળકની માતા એપાર્ટમેન્ટમાં જ હતી. માતા-પિતા દારૂ પીવામાં ભાન ભૂલ્યા અને બાળકના પલંગને બારીમાંથી દૂર ખસેડ્યો ન હતો.

આ બાળકના માતાપિતાની ઉંમર ૨૧ અને ૨૩ વર્ષ હોવાનું કહેવાય છે. તપાસ કરનારાઓએ જણાવ્યું હતું કે પુરાવા છે કે જ્યારે તેમનો પુત્ર ખુલ્લી બારીમાંથી પડ્યો ત્યારે તે બંને દારુ પીતા હતા. ગંભીર કેસની તપાસ કરતી રશિયન તપાસ સમિતિએ આ દુઃખદ કેસ પછી સલાહ સૂચન જાહેર કર્યા છે, જેમાં બાળકોને લગતા જોખમો અંગે ઊંચા ફ્લેટમાં રહેતા માતા-પિતાને ચેતવાયા છે.

રશિયામાં બાળકોને લઈને નિયુક્ત લોકપાલ અન્ના કુજનેત્સોવાએ જાહેર કર્યું કે ગયા વર્ષે રશિયામાં ઊંચા ફ્લેટ્સમાંથી બાળકોના નીચે પડવાના કુલ ૧,૩૩૯ કેસ નોંધાયા છે. તેમણે જણાવ્યું હતું કે આ અકસ્માતોમાં કુલ ૧૪૫ બાળકોનાં મોત નીપજ્યાં છે, જ્યારે બાકીના બાળકોને ગંભીર અને સામાન્ય ઈજાઓ પહોંચી છે. તેમણે એમ પણ કહ્યું હતું કે 'બાળકોના બારીમાંથી પડવાની સમસ્યા હવે આપણી પીડા બની રહી છે.'