Gujarati News

લંડન,તા.૧૮:હાલમાં યુકેમાં ટ્રક ડ્રાઈવરોની ઘણી ખોટ વર્તાઈ રહી છે. જેના કારણે કંપનીઓ ટ્રક ડ્રાઈવરોને નોકરી પર રાખવા માટે તગડા પગારની ઓફર કરી રહ્યા છે. ટેસ્કો અને સેન્સબરી જેવી કંપનીઓ ટ્રક ડ્રાઈવરોને પ્રતિ વર્ષ ૭૦,૦૦૦ પાઉન્ડ (અંદાજીત ૭૨ લાખ રૂપિયા)નો પગાર તથા ૨,૦૦૦ પાઉન્ડ જોઈનિંગ બોનસ તરીકે ઓફર કરી રહી છે.

હાલમાં યુકેમાં ૧,૦૦,૦૦૦ જેટલા ટ્રક ડ્રાઈવરોની ખોટ પડી છે તેથી અનુભવી લોકોને સુપરમાર્કેટમાં સ્ટોક જાળવી રાખવા માટે તેમની સેવાના બદલે લાખો રૂપિયાનો પગાર આપીને કામ પર રાખવા માટે ઓફર આપવામાં આવી રહી છે.

બ્રિટનના સુપરમાર્કેટમાં ટ્રક ડ્રાઈવરોને જેટલી સેલેરી આપવામાં આવી રહી છે તેટલી આપણા દેશમાં સારા-સારા એન્જિનિયર્સને પણ મળી રહી નથી. ત્યાંના સુપર માર્કેટમાં માલની ડિલિવરી કરનારા ટ્રક ડ્રાઈવરોને ૭૦,૦૦૦ પાઉન્ડની વાર્ષિક સેલેરી આપવામાં આવી રહી છે. આ ઉપરાંત નોકરી પર જોડાય ત્યારે ૨,૦૦૦ પાઉન્ડનું બોનસ આપવામાં આવી રહ્યું છે.

૧૭ વર્ષથી ટ્રક ચલાવી રહેલા બેરી નામના એક ડ્રાઈવરે દાવો કર્યો હતો કે એક એજન્ટ દ્વારા તેને ૨,૦૦૦ બોનસ સાથે બે વર્ષના કોન્ટ્રાકટની ઓફર કરી હતી. અમને સપ્તાહમાં પાંચ રાતની ડ્યુટીની ઓફર કરવામાં આવી હતી જેમાં શનિવાર માટે દોઢ ગણા અને રવિવાર માટે બે ગણી ચૂકવણી કરવામાં આવી હતી. આ વ્યવસાયમાં આ ઘણો આઘાતજનક પગાર છે.

એનો મતલબ છે કે મારા બોસ પણ આટલું કમાતા નથી. તે હકિકતમાં વીકેન્ડ પર સુપરમાર્કેટ ડિલિવરી ડ્રાઈવરોની શોધ કરી રહ્યા છે અને તેમના માટે રૂપિયા મહત્વના નથી. તેણે કહ્યું હતું કે એક અજ્ઞાત એજન્સીએ તેને નોકરીની ઓફર કરી હતી. જેમાં સેન્સબરી અને ટેસ્કો સામેલ હતી. જુલાઈમાં ટેસ્કો સપ્ટેમ્બરના અંત પહેલા કંપનીમાં સામેલ થનારા ડ્રાઈવરોને ૧,૦૦૦ પાઉન્ડ બોનસની ઓફર કરી હતી.

ફેડરેશન ઓફ હોલસેલ ડિસ્ટ્રિબ્યુટર્સના મુખ્ય કાર્યકારી જેમ્સ બેઈલ્બીએ જણાવ્યું હતું કે, આ અછતના કારણે ગ્રાહકોને વધારે કિંમત ચૂકવવી પડશે. તેમણે કહ્યું હતું કે, આ અછતમાંથી એજન્સીઓ અને લોજિસ્ટિક કંપનીઓ જંગી કમાણી કરશે. જેનું ભારણ અંતે તો ગ્રાહકો પર જ આવવાનું છે.