Gujarati News

લંડન,તા. ૨૪: બ્રિટનમાં ૩.૭ ફૂટના યુવક અને ૫.૪ ફૂટની યુવતીએ લગ્ન કરી નવો વર્લ્ડ રેકોર્ડ બનાવ્યો છે. તેમના નામ પતિ-પત્નીની લંબાઈમાં સૌથી વધુ અંતર માટે ગિનિઝ વર્લ્ડ રેકોર્ડમાં નોંધવામાં આવ્યા છે. તેમની લંબાઈમાં ૧.૭ ફૂટનું અંતર છે. આ કપલ છે ૩૩ વર્ષનો જેમ્સ લસ્ટેડ અને ૨૭ વર્ષની કલોઈ. બંને બ્રિટનના વેલ્સમાં રહે છે.ગિનિઝ વર્લ્ડ રેકોર્ડઝે ખુલાસો કર્યો છે કે, અલગ-અલગ લિંગના વિવાહિતોની શ્રેણીમાં આ કપલની ઊંચાઈમાં અંતર દુનિયામાં સૌથી વધુ છે. જેમ્સ લસ્ટેડ એક ટીવી શોમાં મૂક અભિનય કરે છે. તેને ડાયસ્ટ્રોફિક ડિસપ્લેસિયા નામથી ઓળખાતું એક દુર્લભ પ્રકારનું ઢીંગણાપણું છે. જેમ્સ પોતાની પત્ની કલોઈને પહેલી વખત કોમન ફ્રેન્ડ્સ દ્વારા એક પબમાં મળ્યો હતો.

જમ્સ અને કલોઈએ વર્ષ ૨૦૧૬માં લગ્ન કર્યા હતા. આ દરમિયાન તેણે સીડી પર ચડીને ચર્ચમાં ફાદરના આદેશ પર પત્નીને કિસ કરી હતી. આ કપલને ઓલિવિયા નામની બે વર્ષની એક દીકરી પણ છે. કલોઈએ સ્વીકાર્યું કે, શરૂમાં તે લાંબા કદના છોકરાઓ પ્રત્યે આકર્ષિત રહેતી હતી, પરંતુ જયારે તે જેમ્સને મળી તો તેની પસંદ એકદમ બદલાઈ ગઈ.જેમ્સને તેના પરિવારના લોકો અને મિત્રો પ્રેમથી જો નામથી બોલાવે છે. તે એક પ્રકારે આનુવંશિક બીમારીથી પીડાય છે. પરંતુ તેની દીકરીને આ બીમારી નથી. જેમ્સ કહે છે કે, જયારે ફ્લોરિડાના ડિઝનીના પ્રવાસ દરમિયાન કલોઈએ પ્રપોઝ કર્યું તો તે પોતાને ૧૦ ફૂટ લાંબો અનુભવી રહ્યો હતો. તેણે કહ્યું કે, મારી દીકરીને તેડવી મારા માટે દુનિયાના સૌથી સારા કામોમાંથી એક છે. કલોઈ સાથે લગ્ન કર્યા તેને તે પોતાનો જીવનનો સૌથી સારો દિવસ માને છે.ડાયસ્ટ્રોપિક ડિસપ્લેસિયા એક દુર્લભ બીમારી છે. આ બીમારીથી વ્યકિતનું શરીર વિકૃત અને કદ નાનું રહે છે. ધ પોર્ટલ ફોર રેર ડિસીઝ મુજબ, આ વિકાર પુરુષો અને મહિલાઓને સમાન રીતે પ્રભાવિત કરે છે. આ બીમારી અંદાજે એક લાખ લોકોમાંથી એક કે બેને થાય છે. જે લોકોને ડાયસ્ટ્રોફિક ડિસપ્લેસિયા હોય છે, તેમનામાં મોટાભાગે જન્મથી જ લક્ષણો જોવા મળે છે.