Gujarati News

વોશિંગ્ટન, તા.૨૭ : ધ રોક નામથી ઓળખાતા લોકપ્રિય અમેરિકન એક્ટર ડ્વેન જોનસન અભિનયની સાથે સાથે પોતાની સ્ટાઈલને કારણે પણ વખણાય છે. તાજેતરમાં ડ્વેન જોનસને એવું કામ કર્યું છે કે ચારેબાજુ તેમના વખાણ થઈ રહ્યા છે. ડ્વેન જોનસને પોતાની પર્સનલ ટ્રક પોતાના એક ફેનને ગિફ્ટમાં આપી દીધી છે. ડ્વેન જોનસનનો એક વીડિયો સામે આવ્યો છે. લોકો આ વીડિયોને ખૂબ પસંદ કરી રહ્યા છે.

અમેરિકન નેવીના ઓસ્કર રોડિગ્રેઝને આ વર્ષે જાણે ક્રિસમસની ભેટ વહેલી મળી ગઈ. હોલિવૂડ સુપરસ્ટાર ડ્વેન જોનસનની પર્સનલ ટ્રક ગિફ્ટમાં મળવી એ તેના માટે કોઈ નાની વાત નથી. ડ્વેન જોનસન માટે આ ટ્રક ઘણી ખાસ હતી. ડ્વેન જોનસને પોતાના ઈન્સ્ટાગ્રામ અકાઉન્ટ પર લખ્યું છે કે, તે પોતાના ફેન્સ માટે કંઈક સ્પેશિયલ કરવા માંગતા હતા. તેઓ પોતાની નવી રીલિઝ થયેલી ફિલ્મ રેડ નોટિસના સ્પેશિયલ સ્ક્રીનિંગ માટે પહોંચ્યા હતા. તે પોતાના એક ફેન માટે કંઈક યાદગાર કરવા માંગતા હતા. માટે તેમણે પોતાની પર્સનલ ટ્ર ગિફ્ટમાં આપવાનો નિર્ણય લીધો. ડ્વેન જોનસને જે વીડિયો શેર કર્યો છે તે ઘણો ભાવુક કરનારો છે. વીડિયોમાં જોઈ શકાય છે કે ફેન ટ્રક પર મૂકવામાં આવેલી એક નોટ વાંચે છે, જેમાં લખ્યું છે, તમારી સેવા માટે આભાર, તમારી નવી ટ્રકનો આનંદ માણો. આ વાંચીને ફેન ઈમોશનલ થઈ જાય છે અને ડ્વેન જોનસનને ભેટી પડે છે.

ડ્વેન જોનસને ગિફ્ટ આપવા માટે અમેરિકન નેવીના ઓસ્કર રોડિગ્રેઝની પસંદગી કરી તેની પાછળ પણ એક કારણ છે. ડ્વેન જોનસન કહે છે કે, મેં દર્શકો વિષે જાણકારી મેળવી તો હું ઓસ્કરની વાતથી પ્રભાવિત થયો. તે પોતાના ૭૫ વર્ષીય માતાને દેખરેખ કરે છે.

પર્સનલ ટ્રેઈનર છે. ચર્ચમાં લીડર છે. ઘરેલુ હિંસાથી પીડિત મહિલાઓની મદદ કરે છે, તેમને ભોજન પહોંચાડે છે. ઓસ્કર માટે આ આખી ઘટના એક સપના સમાન હતી. તેને સમજ નથી પડતી કે કયા પ્રકારનું રિએક્શન આપવું. ઓસ્કરે આ ટ્રક સાથેની તસવીર સોશિયલ મીડિયા પર શેર કરી છે. તેણે સાથે લખ્યું છે કે, મારી પાસે બોલવા માટે શબ્દ નથી કે હું કેટલો ધન્ય અને આભારી છું.