Gujarati News

ટેકસાસ,તા.૩૦: પૈસાની લાલત માનવીને કેટલી હદ સુધી નીચે પાડી શકે છે, એને પૂરવાર કરતો એક ચોંકાવનારો કિસ્સો સામે આવ્યો છે. જેમાં વીમાના કરોડો રુપિયા હડપી લેવાના ચક્કરમાં એક પતિએ એની પત્નીની હત્યા કરી નાંખી છે. આ કેસ અમેરિકાના ટેકસાસમાંથી સામે આવ્યો છે. વાસ્તવમાં મહિલાએ મૃત્યુના બે દિવસ પહેલા ૧ કરોડ ૮૭ લાખ રુપિયાનો વીમો કરાવ્યો હતો.

એક મીડિયા રિપોર્ટ મુજબ, મહિલાનો મૃતદેહ ટેકસાસ સ્થિત એના ઘરમાંથી મળી આવ્યો હતો. જયાં એ એના ૪૧ વર્ષિય પતિ સાથે રહેતી હતી. આ કેસમાં પતિએ પોલીસને ગેરમાર્ગે દોરવાનો પ્રયત્ન કર્યો હતો. એણે પોલીસને એમ કહ્યું હતું કે, ચોરીના ઈરાદાથી આવેલા ચોરોએ એની પત્નીની નિર્મમ હત્યા કરી નાંખી છે.

આ કેસમાં પોલીસને અલગ જ એન્ગલ લાગતો હોવાથી તંત્રએ સઘન તપાસ હાથ ધરી હતી. જેમાં ખુલાસો થયો હતો કે, મૃતકના પતિએ જ એના માથે ગોળી મારી હત્યા કરી હતી. આ ખુલાસો મૃતકના પાડોશીના નિવેદનને લીધે ઉભી થયેલી શંકા બાદ થયો હતો. એમના પાડોશીએ નિવેદન આપ્યું હતું કે, મહિલાની હત્યાના દિવસે પતિ-પત્ની વચ્ચે ગંભીર ઝઘડો થયો હતો. જેનો અવાજ એમના ઘર સુધી સંભળાતો હતો. હત્યા કર્યા પછી મહિલાના પતિએ નોન ઇમરજન્સી હોટલાઇન પર કોલ કરી જણાવ્યું હતું કે, આ સમયે એ જીમમાં છે અને ઘરેથી એની પત્નીએ મેસેજ કર્યો છે કે ઘરમાં કોઇ ઘૂસી આવ્યું છે. તેણે પોલીસને ફોન કરી મદદ માંગી હતી. જયારે પોલીસ ઘરે પહોંચી ત્યારે એની પત્ની મૃત અવસ્થામાં મળી આવી હતી.

જોકે ઘરની પરિસ્થિતિને જોતાં પોલીસને તરત શંકા ગઇ હતી કે ઘરમાં અન્ય કોઇએ ઘૂસવાનો કોઇ પ્રયત્ન કર્યો નથી. ઘરનો પાછળનો દરવાજો ખુલ્લો હતો અને ઘરમાં ચાર કૂતરા પણ હાજર હતા. જો કોઇ બનાવ બન્યો હોત તો કૂતરા પ્રતિક્રિયા જરુરથી આપતાં.

તપાસમાં સામે આવ્યું કે મૃતક મહિલાએ બે દિવસ પહેલા જ વીમા પોલિસી ખરીદી હતી, જેનો સીધો ફાયદો એના પતિને મળતો હતો.