અફઘાનિસ્તાનમાં તાલિબાની આતંકવાદીઓને બોંબની ટ્રેનિંગ લેવી ભારે પડી:30ના મોત
નવી દિલ્હી: પ્રકૃતિનો નિયમ છે કે ખરાબ કામનું પરિણામ પણ ખરાબ આવે છે. આવું જ કંઈક અફઘાનિસ્તાનમાં તાલિબાન આતંકવાદીઓ સાથે થયું છે. અફઘાનિસ્તાનમાં એક મસ્જિદની અંદર બોંબ બનાવવાની ટ્રેનિંગ લઈ રહેલાં તાલિબાન આતંકવાદીઓને આ 'કલાસ' ખૂબ મોંઘો પડ્યો છે, આ ટ્રેનિંગ દરમિયાન બોંબ ધડાકો થતાં 30 તાલિબાન આતંકવાદીઓના મોત થયા છે. અફઘાનિસ્તાનના સૈન્ય અધિકારીઓના કહેવા અનુસાર 6 વિદેશી સહિત 30 આતંકવાદીઓ ઘટનામાં માર્યા ગયા છે.
આ વિદેશ આંતકવાદીઓ સુરંગ બનાવવામાં નિષ્ણાત હતા અને શનિવારે એ 26 અન્ય આતંકવાદીઓને બોંબ બનાવવાની ટ્રેનિંગ આપી રહ્યા હતા. સ્થાનિક મીડિયાના અહેવાલ અનુસાર આ વિસ્ફોટ બાલ્ફ પ્રાંતના દોલતાબાદ જિલ્લાના કુલ્તાક ગામમાં થયો છે. અફઘાન સૈન્યે એક નિવેદન જાહેર કરીને કહ્યું છે કે માર્યા ગયેલા 6 વિદેશી આતંકવાદીઓની ઓળખ થઈ શકી નથી. ખમ્મા પ્રેસના અહેવાલ અનુસાર તાલિબાન આતંકવાદીઓ એક મસ્જિદની અંદર એકત્ર થયા હતા અને તેમને બોંબ અને આઈઈડી બનાવવાની ટ્રેનિંગ આપવામાં આવી રહી હતી.