ચીને પાકિસ્તાન માટે તૈયાર કર્યું બીજું યુદ્ધ જહાજ
નવી દિલ્હી: ચીને પાકિસ્તાન નેવી માટે બીજા પ્રકારનું 054A/P ફ્રિગેટ PNS તૈમુર તૈયાર કર્યું છે. ચીનના રાજ્ય મીડિયાના અહેવાલો અનુસાર, PNS તૈમૂરને 23 જૂને શાંઘાઈના હુડોંગ-ઝોંગુઆ શિપયાર્ડમાં કાર્યરત કરવામાં આવ્યું હતું. અહેવાલો સૂચવે છે કે પાકિસ્તાને 2017ના સોદા હેઠળ ચીનને PNS તૈમૂર બનાવવાનો આદેશ આપ્યો હતો. PNS તૈમૂરને એપ્રિલ 2022માં જ પાકિસ્તાનને સોંપવામાં આવનાર હતું પરંતુ ચીનમાં કોરોના વાયરસના વધતા સંક્રમણને કારણે તેમાં બે મહિનાનો વિલંબ થયો છે. જણાવી દઈએ કે નવેમ્બર 2021માં પહેલીવાર ચીને નિર્મિત યુદ્ધ જહાજ PNS તુઘરુલને તેના કાફલામાં સામેલ કરવામાં આવ્યું હતું. PNS તૈમૂર વિશે હજુ સુધી ચોક્કસ માહિતી ઉપલબ્ધ નથી, પરંતુ મીડિયા રિપોર્ટ્સ અનુસાર PNS તૈમૂરમાં એડવાન્સ્ડ ઈલેક્ટ્રોનિક રડાર સિસ્ટમ લગાવવામાં આવી છે. આ યુદ્ધજહાજમાં પ્રચંડ ફાયરપાવર અને સર્વેલન્સ ક્ષમતા છે. આ યુદ્ધ જહાજ એન્ટિ-એર, એન્ટિ-સરફેસ અને એન્ટિ-સબમરીન ઓપરેશન્સ સફળતાપૂર્વક પાર પાડી શકે છે.