હે ભગવાન......આ પાકિસ્તાનીએ કુતરા,બિલાડાની જગ્યાએ જિરાફને પાળ્યું
નવી દિલ્હી: કૂતરો પાળો, બિલાડી પાળો કે પિંજરામાંપોપટ યા લવ બર્ડ પાળો ત્યાં સુધીની વાત સમજાય. પરંતુ પાકિસ્તાનના કરાચી શહેરમાં એક વ્યક્તિએ પોતાના ઘરમાં જિરાફ પાળ્યું હતું. તાજેતરમાં આ જિરાફની એક વિડિયો ક્લીપ સોશ્યલ મિડિયા પર વાઇરલ થઇ હતી.
નોર્બર્ટ આલ્મેડા નામની વ્યક્તિએ આ વિડિયો ક્લીપ સોશ્યલ મિડિયા પર મૂકી હતી. એ જોઇને સોશ્યલ મિડિયા પર અનેક યુઝર્સે નારાજી વ્યક્ત કરી હતી. આ કિસ્સો હવે સિંધ વાઇલ્ડ લાઇફ ડિપાર્ટમેન્ટના કન્ઝર્વેટર સુધી પહોંચ્યો હતો. જો કે વિડિયો ક્લીપ દ્વારા એ વાતનો ખ્યાલ આવતો નથી કે આ જિરાફનો માલિક કોણ છે, કોણે એને પાળ્યું છે. ફક્ત એટલું દેખાય છે કે પોતાની અસાધારણ ઊંચાઇના કારણે આ જિરાફ પોતાના ઘરની દિવાલની બહાર ડોકિયાં કરી રહ્યું હતું.