Gujarati News

નવી દિલ્‍હી તા. ૧ : કેન્‍દ્ર સરકાર ઓગસ્‍ટમાં કેન્‍દ્રીય કર્મચારીઓને સારા સમાચાર આપી શકે છે. આગામી મહિને કેન્‍દ્રીય કર્મચારીઓના DAમાં વધારા અંગે નિર્ણય લેવામાં આવી શકે છે. આ સાથે, તેમના બાકી ડીએની ચુકવણી અંગે પણ જાહેરાત કરી શકાય છે. આ રીતે સરકાર કર્મચારીઓને બેવડી ભેટ આપી શકે છે. સરકારી કર્મચારીઓના ડીએમાં વધારાને લઈને ઘણા સમયથી અટકળો ચાલી રહી છે. આવી સ્‍થિતિમાં ઓગસ્‍ટમાં સરકાર DAમાં વધારાને લઈને મોટી જાહેરાત કરી શકે છે. જો કે હજુ સુધી સરકાર તરફથી આ અંગે કોઈ નિવેદન આવ્‍યું નથી.

કેન્‍દ્રીય કર્મચારીઓ લાંબા સમયથી તેમના ૧૮ મહિનાના ડીએના બાકી ચૂકવણીની માંગ કરી રહ્યા છે. કોવિડને કારણે સરકારે જાન્‍યુઆરી ૨૦૨૦ થી જૂન ૨૦૨૧ સુધી કર્મચારીઓનો DA રોકી રાખ્‍યો હતો. કર્મચારીઓ તેમના બાકી ડીએની ચૂકવણીની સતત માંગ કરી રહ્યા છે. સમાચાર અનુસાર, જો સરકાર આવતા મહિને બાકી DA ચૂકવે છે, તો તે વધેલા ૧૧ ટકા ઉમેરીને પૈસા ખાતામાં મૂકશે.

કેન્‍દ્રીય કર્મચારીઓના ડીએમાં વધારા અંગે પણ સરકાર નિર્ણય લઈ શકે છે. ફુગાવાનો દર સળંગ કેટલાંક મહિનાઓથી રિઝર્વ બેંક દ્વારા નિર્ધારિત આંકડા કરતાં ઊંચો રહ્યો છે. આરબીઆઈએ ફુગાવાના દરનું ધોરણ ૨ થી ૬ ટકા નક્કી કર્યું છે. જયારે રિટેલ મોંઘવારી દર ૭.૦૧ ટકા છે.

જો તમે ગણતરી પર નજર નાખો તો ૫૬,૯૦૦ રૂપિયાની મહત્તમ બેઝિક સેલેરી પ્રમાણે ૩૪ ટકા ડીએ ૧૯,૩૪૬ રૂપિયા થાય છે. જો તેમાં ૪ ટકાનો વધારો થાય છે, તો ૩૮ ટકાના દરે DA ૨૧,૬૨૨ રૂપિયા થશે. એટલે કે, પગારમાં દર મહિને ૨,૨૭૬ રૂપિયાનો વધારો થશે.