Gujarati News

ક્વિટો , તા.૩૦ : દક્ષિણ અમેરિકાના એક દેશ ઈક્વાડોરના શહેર ગ્વાયાકિલની જેલમાં બે સમૂહો વચ્ચે થયેલી હિંસક અથડામણમાં મૃતકોની સંખ્યામાં સતત વધારો થઈ રહ્યો છે. અત્યાર સુધી ઓછામાં ઓછા ૧૦૦ કેદીઓનાં મોત થયા છે અને ૫૨ લોકો ઈજાગ્રસ્ત થયા છે. અધિકારીઓએ આ વાતની જાણકારી આપી છે. પોલીસ કમાન્ડર ફાબિયાન બસ્તોસે મીડિયાને જણાવ્યું કે, લગભગ પાંચ કલાક પછી પોલીસ અને સેનાએ અભિયાનની મદદથી જેલ પર નિયંત્રણ પ્રાપ્ત કર્યું.

અધિકારીઓએ જણાવ્યું કે, જેલમાંથી અનેક હથિયાર જપ્ત કરવામાં આવ્યા છે. જેલના લૉસ લોબોસ અને લૉસ ચોનેરોસ સમૂહ વચ્ચે થયેલા વિવાદ પછી હિંસા શરુ થઈ ગઈ હતી. આ ઝડપ દરમિયાન બંદૂકો અને છરીનો ઉપયોગ કરવામાં આવ્યો અને વિસ્ફોટ પણ કરવામાં આવ્યો.

ટેલિવિઝન પર પ્રસારિત તસવીરોમાં જોઈ શકાય છે કે કેદીઓ જેલની બારીઓમાંથી ગોળીબાર કરી રહ્યા છે અને આ દરમિયાન ચારેબાજુ ધુમાડો થઈ ગયો છે. ફાયરિંગનો અને વિસ્ફોટનો અવાજ પણ સંભળાઈ રહ્યો છે.

ગુઆસ સરકારે પોતાના ટ્વિટર અકાઉન્ટ પર તસવીરો શેર કરી છે, જેમાં જોઈ શકાય છે કે જેલના એક ભાગમાંથી છ રસોઈયાઓને બહાર નીકાળવામાં આવી રહ્યા છે. આ પહેલા જુલાઈમાં થયેલી જેલ હિંસા દરમિયાન પણ ૧૦૦થી વધારે દર્દીઓના મોત થઈ ગયા હતા. ત્યારપછી રાષ્ટ્રપ્રમુખ ગિલેર્મો લેસ્સોએ ઈક્વાડોરની જેલ પદ્ધતિમાં ઈમર્જન્સીની જાહેરાત કરી હતી. ઉલ્લેખનીય છે કે, ઈક્વાડોરમાં અવારનવાર આ પ્રકારના ગેંગવોર થતા રહે છે.

ગત વર્ષ દરમિયાન ડિસેમ્બર મહિનામાં જેલની અંદર થયેલી લડાઈમાં ૧૧ લોકોનાં મોત થયા હતા અને સાત લોકો ઈજાગ્રસ્ત થયા હતા. ઈક્વાડોર જ નહીં, લેટિન અમેરિકાના અન્ય દેશોમાં પણ જેલની અંદર અવારનવાર આ પ્રકારની હિંસા થતી રહે છે. આ પ્રકારની હિંસાના વીડિયો સોશિયલ મીડિયા પર શેર થતા રહે છે.