Gujarati News

હૈદરાબાદ, તા.૧ દક્ષિણ ભારતના તેલંગાણામાં એક ચોંકાવનારી ઘટના બની છે કે જેમાં માત્ર ૧૩ વર્ષની છોકરીનું હાર્ટ અટેકના કારણે મોત થયું છે. બોડા નામની આ છોકરી ધોરણ ૬માં અભ્યાસ કરતી હતી અને તેને રાત્રે અચાનક શ્વાસ લેવામાં તકલીફ થઈ હતી. તેને ડૉક્ટર પાસે લઈ જવામાં આવે તે પહેલા જ તેનું મોત નીપજ્યું હોવાનું જાણવા મળે છે. તે ગામમાં દાદા-દાદીના ઘરમાં જ ઢળી પડી હતી.

પોલીસના જણાવ્યા મુજબ, તે રાત્રે ૧૨.૩૦ વાગ્યે ઉઠી હતી અને શ્વાસ લેવામાં તકલીફ થઈ રહી હોવાનું જણાવ્યું હતું. તેણે દાદીને કહ્યું હતું કે તેની છાતીમાં ભારે દુઃખાવો થઈ રહ્યો છે. જ્યારે આ છોકરીને ડૉક્ટર પાસે લઈ જવામાં આવી રહી હતી ત્યારે ૧ વાગ્યા આસપાસ તેનું મોત નીપજ્યું હતું. આ છોકરી એક ખાનગી શાળામાં અભ્યાસ કરતી હોવાનું જાણવા મળે છે. તેના માતા-પિતા ખેડૂત છે. ગામમાં રહેતી અને સ્કૂલમાં અભ્યાસ કરતી છોકરીનું હાર્ટ અટેકથી મોત થતાં લોકો ચોંકી ઉઠ્યા છે.

ગત મહિને રાજકોટમાં ક્રિકેટ રમતી વખતે ૪૫ વર્ષીય મયૂર મકવાણાનું હાર્ટ અટેકના કારણે મૃત્યુ થયું હતું. શાસ્ત્રી ક્રિકેટ ગ્રાઉન્ડમાં ક્રિકેટ રમતી વખતે તેઓ એકાએક મેદાનમાં ઢળી પડ્યા હતા. છેલ્લાં થોડા સમયમાં રાજકોટમાં ત્રીસી અને ચાળીસીમાં રહેલા ઓછામાં ઓછા છ યુવકોના હાર્ટ અટેકના કારણે મોત થયા છે. ફેબ્રુઆરીમાં સ્ટેટ ગુડ્સ એન્ડ સર્વિસ ટેક્સ (SGST) ડિપાર્ટમેન્ટના ૩૪ વર્ષીય સિનિયર ક્લાર્ક વસંત રાઠોડનું પણ ક્રિકેટ રમતી વખતે હાર્ટ અટેકથી મોત થયું હતું. અમદાવાદમાં ભાડજ નજીક આવેલા ડેન્ટલ કોલેજના પ્લેગ્રાઉન્ડમાં તેમને હાર્ટ અટેક આવ્યો હતો. રાજકોટના સિનિયર તબીબ ડૉ. રાજેશ તૈલીએ જણાવ્યું કે, છેલ્લા થોડા સમયગાળામાં રાજ્યભરમાંથી એવા કિસ્સા સામે આવ્યા છે જ્યાં જીમ કરતાં કે કોઈ સ્પોર્ટ્સ એક્ટિવિટી કરી રહેલા લોકોના હાર્ટ અટેકના કારણે મોત થયા હોય. *આ ટ્રેન્ડ કોઈક બીજી જ તરફ ઈશારો કરી રહ્યો છે. આ લોકો તણાવગ્રસ્ત જીવન જીવી રહ્યા હતા, ખાવાપીવાની આદતો અને જીવનશૈલી અનિયમિત હતી તેના સંકેત મળી રહ્યા છે. કોઈપણ વ્યક્તિ જે કોઈ સ્પોર્ટ્સ એક્ટિવિટી શરૂ કરવા માગતું હોય તેમણે પહેલા પોતાની શારીરિક તેમજ હૃદયની ક્ષમતા ચકાસી લેવી જોઈએ*, તેમ ડૉક્ટર તૈલીએ ઉમેર્યું.