Gujarati News

હરિદ્વારા, તા.૨: ઉત્તરાખંડમાં આવેલા ઋષિકેશમાં લક્ષ્મણ ઝૂલા અને ગંગાના અન્ય ઘાટ પર વિદેશી મહિલાઓએ ન્યૂડ ફોટોશૂટ કરાવ્યું અને અશ્લીલ વિડીયો બનાવીને સોશિયલ મીડિયા પર પોસ્ટ કર્યા હોવાનું જાણવા મળ્યું છે. ત્યારબાદ પોલીસે આરોપીઓ વિરુદ્ઘ જાહેર સ્થળે અશ્લીલતા ફેલાવવાના આરોપ હેઠળ કેસ નોંધ્યો છે અને આ કેસમાં વધુ તપાસ હાથ ધરવામાં આવી છે.

ઉત્તરાખંડમાં આવેલું ઋષિકેશ તેના શુદ્ઘ વાતાવરણ અને જોવાલાયક કુદરતી દ્રશ્યો માટે પ્રસિદ્ઘ હોવાથી દેશ-વિદેશના પર્યટકો માટે આકર્ષણનું કેન્દ્ર છે. અહીં દર વર્ષે હજારે વિદેશ ટૂરિસ્ટ્સ આવે છે અને ઘણાં દિવસો સુધી અહીં પ્રવાસ કરે છે. પરંતુ, આ વિદેશી નાગરિકો ઘણીવખત ઋષિકેશની ધાર્મિક મર્યાદાઓને ઓળંગી જાય છે. ત્યારે હાલમાં જ ઋષિકેશના પ્રખ્યાત લક્ષ્મણ ઝૂલા પર વિદેશી મહિલાઓએ ન્યૂડ ફોટોશૂટ કરાવ્યું હોવાનું જાણવા મળતા હોબાળો મચી ગયો છે.

પોલીસ ફરિયાદ મુજબ ઋષિકેશની કેટલીક હોટેલમાં રોકાયેલા વિદેશી નાગરિકો ગંગાના અલગ-અલગ ઘાટ અને લક્ષ્મણ ઝૂલા પર મહિલાઓના નગ્ન ફોટોગ્રાફ્સ શૂટ કરીને સોશિયલ મીડિયા પર પોસ્ટ કરતા હોવાનું જાણવા મળ્યું હતું.

પોલીસે જણાવ્યું કે ફરિયાદના આધારે આરોપીઓ વિરુદ્ઘ સંબંધિત કલમ હેઠળ કેસ દાખલ કરવામાં આવ્યો છે. આ કેસની ગંભીરતાથી તપાસ કરવામાં આવી રહી છે અને જે દોષી હશે તેના પર ચોક્કસ કાર્યવાહી કરવામાં આવશે.