Gujarati News

નવી દિલ્હી, તા.૨: સુપ્રીમ કોર્ટે બુધવારે કહ્યું કે, પતિ-પત્ની વચ્ચેના વિવાદમાં બાળકને કોઈ સમસ્યાનો સામનો કરવો ન જોઈએ કારણ કે, એવું માનવામાં આવે છે કે પુત્ર પુખ્ત થાય ત્યાં સુધી તેની સંભાળ રાખવાની જવાબદારી પિતાની છે. જસ્ટિસ એમ.આર.શાહ અને જસ્ટિસ એ.એસ. બોપન્નાએ કહ્યું કે, પતિ-પત્ની વચ્ચે ગમે તેટલો વિવાદ હોય, બાળકને તકલીફ ન પડવી જોઈએ. બાળક/દીકરો પુખ્ત ન બને ત્યાં સુધી બાળકના વિકાસને જાળવવાની જવાબદારી પિતાની રહે છે.

આ બેંચે કહ્યું કે, બાળકની માતા કમાણી કરતી નથી અને તે જયપુરમાં તેના પૈતૃક ઘરમાં રહે છે. તેથી, તેના પુત્રના શિક્ષણ સહિત ભરણપોષણ માટે, વ્યાજબી/પર્યાપ્ત રકમની જરૂર છે, જે ઉત્તરદાતા-પતિએ ચૂકવવાની રહેશે.

સુપ્રીમ કોર્ટે, બંધારણની કલમ ૧૪૨ હેઠળ તેની સત્તાનો ઉપયોગ કરીને, ફેમિલી કોર્ટ અને હાઈકોર્ટ દ્વારા પતિ અને પત્નીને આપવામાં આવેલા છૂટાછેડાના હુકમને સમર્થન આપ્યું હતું. તેમણે પિતાને દર મહિને ૫૦,૦૦૦ રૂપિયા ભરણપોષણ ચૂકવવાનો પણ નિર્દેશ આપ્યો હતો.

બેન્ચે એ હકીકતની નોંધ લીધી કે, વિખૂટા પડી ગયેલા દંપતી મે ૨૦૧૧થી સાથે નથી રહેતા.

ખંડપીઠે કહ્યું કે, ડિસેમ્બર ૨૦૧૯ થી પિતાએ રકમ ચૂકવવાનું બંધ કરી દીધું હતું, જે ૧૫ નવેમ્બર, ૨૦૧૨ ના રોજ પસાર કરાયેલા આદેશ અનુસાર સૈન્ય અધિકારીઓ દ્વારા ચૂકવવામાં આવી રહ્યું હતું.

બેન્ચે જણાવ્યું હતું કે, પ્રતિવાદી-પતિને પ્રતિવાદીની સ્થિતિ મુજબ, પુત્રના ભરણપોષણ માટે ડિસેમ્બર ૨૦૧૯ થી અરજદાર-પત્નીને દર મહિને રૂ. ૫૦,૦૦૦ ચૂકવવાનો નિર્દેશ આપવામાં આવે છે. ડિસેમ્બર ૨૦૧૯ થી નવેમ્બર ૨૦૨૧ સુધી દર મહિને ૫૦,૦૦૦ આજથી આઠ અઠવાડિયાના સમયગાળામાં ચૂકવવામાં આવશે.

આ દંપતીના લગ્ન ૧૬ નવેમ્બર, ૨૦૦૫ના રોજ થયા હતા અને તે સમયે તે વ્યકિત મેજર તરીકે ફરજ બજાવતો હતો. દંપતીનું બાળક હવે ૧૩ વર્ષનું છે.