Gujarati News

નવી દિલ્‍હી, તા.૩: દિગ્‍ગજ ઉદ્યોગપતિ ગૌતમ અદાણી માટે વર્ષ ૨૦૨૩ ઘણું મુશ્‍કેલ સાબિત થઈ રહ્યું છે. એક સમય એવો હતો જ્‍યારે અનુમાન લગાવવામાં આવી રહ્યું હતું કે ગૌતમ અદાણી વિશ્વના અમીરોની યાદીમાં પ્રથમ સ્‍થાને પહોંચી શકે છે. તે જ સમયે, સ્‍થિતિ એ છે કે ગૌતમ અદાણી ટોચના ૧૦માં કયાંય નથી, અમીરોની યાદીમાં ટોચના ૨૦માંથી બહાર નીકળી ૨૨મા ક્રમે પહોંચી ગયા છે. અમેરિકાની શોર્ટ સેલિંગ ફર્મ હિંડનબર્ગ રિસર્ચે ગૌતમ અદાણીને મોટો ઝટકો આપ્‍યો છે. અદાણીએ ગયા વર્ષે $૪૪ બિલિયનની કમાણી કરી હતી, પરંતુ છેલ્લા પાંચ દિવસમાં તેનાથી વધુનું નુકસાન થયું છે. બ્‍લૂમબર્ગ બિલિયોનેર ઇન્‍ડેક્‍સ અનુસાર, અદાણીએ આ વર્ષે અત્‍યાર સુધીમાં $૪૮.૫ બિલિયન (આશરે રૂ.૩૯,૬૧,૭૨,૪૯,૨૫,૦૦૦) નેટવર્થ ગુમાવ્‍યું છે. ભૂતકાળમાં અદાણી ગ્રૂપના તમામ દસ શેરોમાં પણ જોરદાર ઘટાડો જોવા મળ્‍યો હતો. આ કારણે અદાણીને એક જ દિવસમાં $૧૨.૫ બિલિયનનો ફટકો પડ્‍યો અને તેમની નેટવર્થ ઘટીને $૭૨.૧ બિલિયન થઈ ગઈ. વિશ્વના અમીરોની યાદીમાં તે સતત નીચે સરકી રહ્યો છે. આ સાથે એશિયામાં પણ તેમનું સામ્રાજ્‍ય છીનવાઈ ગયું છે. રિલાયન્‍સ ઈન્‍ડસ્‍ટ્રીઝના મુકેશ અંબાણી ફરી એકવાર એશિયાના સૌથી મોટા અબજોપતિ બની ગયા છે.

અમેરિકન ઇન્‍વેસ્‍ટમેન્‍ટ રિસર્ચ ફર્મ અને શોર્ટ સેલર હિંડનબર્ગના રિપોર્ટ બાદ અદાણી ગ્રુપના ઘણા શેર ૬૦ ટકા તૂટયા છે. આ કારણોસર, ગૌતમ અદાણી બ્‍લૂમબર્ગ બિલિયોનેર ઈન્‍ડેક્‍સના ટોચના ૧૦ અબજપતિઓની યાદીમાં સીધા ૨૧મા નંબરે પહોંચી ગયા છે. આ વર્ષ એટલે કે ૨૦૨૩ની વાત કરીએ તો ગૌતમ અદાણીની સંપત્તિ $૫૯.૨ બિલિયન ઘટીને $૬૧.૩ બિલિયન થઈ ગઈ છે. અદાણીને માત્ર એક સપ્તાહમાં જ $૫૨ બિલિયનનો મોટો આંચકો લાગ્‍યો છે. ગયા વર્ષની વાત કરીએ તો વિશ્વના ટોચના ૧૦ અમીરોની યાદીમાં માત્ર બે ભારતીયોની સંપત્તિમાં વધારો થયો હતો. જેમાં ગૌતમ અદાણી અને મુકેશ અંબાણીનો સમાવેશ થાય છે. અદાણી કમાણીના મામલામાં નંબર વન હતા. એલોન મસ્‍ક અને જેફ બેસોસ સહિત અમેરિકન અબજોપતિઓ માટે વર્ષ ૨૦૨૨ સારું સાબિત થયું નથી. જોકે હવે તેમના માટે સારા દિવસો શરૂ થયા છે અને ગૌતમ અદાણીના ખરાબ દિવસો ચાલી રહ્યા છે.

વર્ષ ૨૦૨૩ની વાત કરીએ તો ઈલોન મસ્‍ક અત્‍યાર સુધીમાં ૩૬.૫ બિલિયન ડોલરની કમાણી કરી ચૂકયા છે. કમાણીની બાબતમાં નંબર વન. બર્નાર્ડ આર્નોલ્‍ટે તેમની નેટવર્થમાં $૩૦.૭ બિલિયન અને જેફ બેઝોસે $૨૯.૩ બિલિયનનો વધારો કર્યો છે. માર્ક ઝકરબર્ગની સંપત્તિમાં પણ છેલ્લા એક મહિનામાં ૨૪.૧ અબજ ડોલરનો વધારો થયો છે. બર્નાર્ડ આર્નોલ્‍ટ હવે અમીરોની યાદીમાં નંબર વન પર પહોંચી ગયા છે. જો કે ફોર્બ્‍સની યાદીમાં નેટવર્થના સંદર્ભમાં ગૌતમ અદાણીને ૧૭મા સ્‍થાને દર્શાવવામાં આવ્‍યા છે. આ યાદી અનુસાર ગૌતમ અદાણીની નેટવર્થ $૬૪.૨ બિલિયન જણાવવામાં આવી છે. અહીં ગૌતમ અદાણી ગ્રૂપે તેની ફ્‌લેગશિપ કંપની અદાણી એન્‍ટરપ્રાઇઝિસનો ૨૦,૦૦૦ કરોડ રૂપિયાનો FPO પણ પાછો ખેંચી લીધો છે. અદાણીએ પોતે એક નિવેદન જારી કરીને રોકાણકારોને જૂથમાં વિશ્વાસ રાખવા અપીલ કરી છે.