Gujarati News

ચંદીગઢ,તા.૩: પ્રેમમાં નાત-જાત કે ઉંમર જેવા પરિબળો કોઇ મહત્વ નથી રાખતાં. જયાં પ્રેમ હોય ત્યાં પ્રેમી પંખીડા માટે એકબીજાનો પ્રેમ જ સર્વસ્વ હોય છે. આવો જ અજીબ કિસ્સો હરિયાણામાંથી સામે આવ્યો છે, જેને જોઇને હરિયાણા-પંજાબ હાઇકોર્ટ પણ અંચબામાં પડી અને તપાસના આદેશ આપી ચૂકી છે. અહીં એક ૬૭ વર્ષના વૃદ્ઘના પ્રેમમાં પડેલી ૧૯ વર્ષની યુવતીએ ઘર-પરિવાર છોડ્યો અને વૃદ્ઘ પ્રેમી સાથે લગ્ન કરી લીધા.

લગ્ન પછી પરિવાર તરફથી જોખમના નામે પ્રેમી જોડાએ હાઇકોર્ટમાં સુરક્ષા પ્રદાન કરવા માટે અપીલ કરી છે. જોકે આ પ્રેમી જોડાને જોઇને હાઇકોર્ટના જજ પણ ચોંકી ગયા હતા. તેમણે મામલાની ગંભીરતાને જોતાં સદ્યન તપાસના આદેશ આપ્યા છે.

કેસ હરિયાણાના પલવલના એક મુસ્લિમ જોડાનો છે. માહિતી મુજબ ૧૯ વર્ષની યુવતીને ખેતરમાં કામ કરતાં ૬૭ વર્ષના વૃદ્ઘ સાથે પ્રેમ થઇ ગયો, જેની જાણ યુવતીના પરિવારને થતાં તેનો વિરોધ કર્યો. પરંતુ યુવતીએ પ્રેમી સાથે રહેવાની જીદ કરી નિકાહ કરી લીધા. હવે બંનેએ પરિવાર તરફથી જીવનું જોખમ હોવાનું કહીને હાઇકોર્ટના દરવાજા ખટખટાવ્યા છે.

જોકે તેમની અપીલ પર સુનવણી કરતાં જજને શંકા થઇ હતી કે એક ૧૯ વર્ષની યુવતી કેવી રીતે ૬૭ વર્ષના વૃદ્ઘ સાથે લગ્ન કરી શકે. કોર્ટનું કહેવુ છે કે આ કેસમાં કેટલીક પરિસ્થિતિઓ સ્પષ્ટ નથી. જેમ કે વૃદ્ઘના આ પહેલા લગ્ન હોઇ શકે અથવા યુવતી પર લગ્નને લઇને દબાણ કરવામાં આવ્યું હોય. કોર્ટે આ કેસમાં પોલીસને સદ્યન તપાસ કરવાના આદેશ આપવાની સાથે યુવતીને સુરક્ષા પ્રદાન કરવા પણ કહ્યું છે.

કોર્ટે આ માટે પોલીસને ટીમ રચીને તપાસ કરવા જણાવ્યું છે જેમાં વૃદ્ઘના આ કયા લગ્ન છે, તેમજ તેના ભૂતકાળ વિશે પણ જાણકારી મેળવવામાં આવશે.

હાઇકોર્ટમાં આપવામાં આવેલા દસ્તાવેજો મુજબ પ્રેમીની જન્મતારીખ ૧ જાન્યુઆરી ૧૯૫૩ છે જયારે યુવતીની જન્મતારીખ ૧૦ ડિસેમ્બર ૨૦૦૧ છે. યુવતીનું કહેવુ છે કે તેનો પરિવાર સક્ષમ છે અને તેને નુકસાન પહોંચાડી શકે છે. બીજી તરફ યુવતીનો પરિવાર આ લગ્નની વિરુદ્ઘમાં છે અને યુવતીને પાછી મેળવવા માટે સતત પ્રયત્ન કરી રહ્યો છે, પરંતુ યુવતી તેના પ્રેમી સાથે રહેવા માંગે છે.